Kún sáýlesiniń kózge áseri qandaı?
Artyq ýltrakúlgin sáýle kózdiń betki jáne ishki tinderine zaqym keltirýi múmkin. Bul jaǵdaı, ásirese, katarakta sııaqty qaýipti kóz aýrýlaryna ákelip soǵýy yqtımal. Al ınfraqyzyl sáýleler odan da tereń enip, torly qabyqty kúıdirip jiberýi múmkin. Mundaı áserlerdiń saldary – bolashaqta kórý qabiletiniń tolyq joǵalýyna deıin aparady.
Lınzanyń túsine mán berińiz
Kózildirik tańdaýda lınzanyń túsi de mańyzdy ról atqarady. Kózińizge eń qolaılysy – qoıý sur nemese qoıý jasyl tústi lınzalar. Dymqyl tumandy tústi lınzalar kózge túsken tústerdi burmalamaı, keńistikte durys baǵdar alýǵa kómektesedi. Al jasyl tústi lınzalar ýltrakúlgin men ınfraqyzyl sáýlelerdi kóbirek súzedi. Ystyq klımatty elderge bara qalsańyz, High UV-protection dep jazylǵan qoıý tústi kózildirikti tańdaǵan jón.
Kózildiriktegi belgiler neni bildiredi?
- UVB – ýltrakúlgin B toby sáýlelerinen qorǵaıdy, ıaǵnı teri men kózdiń kúıýinen saqtaıdy;
- UVA – ýltrakúlgin A toby sáýlelerinen qorǵaıdy, bul sáýleler tereńirek enip, «fotoqartaıý» áserin týdyrady;
- UVA/UVB – eki top sáýleden de qorǵaıdy, ıaǵnı kózdi kúıikten de, qartaıýdan da saqtaıdy;
- Sun Block – kún sáýlesin tolyqtaı bógeıdi. Mundaı kózildirikter kúnge shyǵýǵa bolmaıtyn adamdarǵa arnalǵan;
- Waterproof – bul belgi kózildiriktiń qorǵanysh qabileti 80 mınýt sýǵa túskennen keıin de saqtalatynyn bildiredi;
- Water Resistance-SPF – sýǵa 40 mınýt túskennen keıingi qorǵanysh deńgeıi.
SPF (Sun Protection Factor) – kúnnen qorǵaıtyn quraldyń tıimdiligin bildiredi. Bul sizdiń kún astynda qansha ýaqyt qaýipsiz júre alatynyńyzdy kórsetedi.
Kózildirikti qaıdan satyp alý kerek?
Kózildirikti tek arnaıy dúkenderden, oftalmolog mamannyń keńesimen satyp alyńyz. Sapasyz lınzalar kórýdi nasharlatyp qana qoımaı, bas aýrýy men kóz ishindegi qysymdy arttyrady. Al durys tańdalmaǵan kózildirik jıegi baǵdar alýyńyzdy qıyndatyp jiberedi.
Polıkarbonattan jasalǵan lınzalar áınekke qaraǵanda qaýipsiz ári sapalyraq. Olar kúnnen jaqsy qorǵaıdy jáne soǵylǵan jaǵdaıda synbaı, syrtqa qaraı ushady, bul jaraqat alý qaýpin azaıtady.
Kózildirik tańdaǵanda ýltrakúlgin sáýlelerden qorǵanys deńgeıi men jaryq súzgish qasıetin eskerińiz. Sapaly kózildiriktiń sheńberiniń ishki nemese janyndaǵy qulaqqa ilinetin tusynda óshpeıtin úlgi kody men marka ataýy bolýy shart. Sonymen qatar, kózildirikke mindetti túrde model kody kórsetilgen jáne sol kod dýjkada qaıtalanatyn tólqujat (pasport) qosa beriledi.
Halyqaralyq standarttar boıynsha:
- Eýropalyq – EN1836,
- Qytaılyq – GB10810,
- Amerıkalyq – ANSIZ 80.3.
- Kóz janary álsiz jandarǵa – fotohromdy lınzalar
Alystan nemese jaqynnan kórý qabileti buzylǵan adamdar úshin fotohromdy lınzalary bar kózildirikter óte yńǵaıly. Bul lınzalar ýltrakúlgin sáýleniń nemese jaryqtyń áserinen ózdiginen qaraıady. Sol sebepti olardy halyq arasynda «hameleon» dep te ataıdy.
Qorytyndylaı kele, kózdiń saýlyǵyn saqtaý – ár adamnyń óz qolynda. Kúnnen qorǵaıtyn kózildirikti durys tańdasańyz, jazdyń shýaqty kúnderinde kózińiz demalady, ózińiz senimdi ári jaıly sezinesiz.
