Foto: ashyq derekkóz
Kópshilikke belgili, lotos – tazalyq pen rýhanı kemeldiliktiń sımvolyna aınalǵan qasıetti gúl. Onyń kóztartar kórkimen qatar sırek ekojúıede ósetindigi de zertteýshilerdiń qyzyǵýshylyǵyn arttyrady. Qazir álemde lotos gúliniń tabıǵı jaǵdaıda ósetin oryndary sanaýly. Sonyń biri – Atyraý óńirindegi Qıǵash ózeniniń saǵasyndaǵy Teńiz mańy. Osyndaı tabıǵı erekshelik óńirge ózindik mártebe berip otyr.
Qurmanǵazy aýdanyndaǵy lotos alqabynyń aýmaǵy shamamen 8–10 gektardy quraıdy. Gúl sabaǵynyń uzyndyǵy 2 metrge deıin jetse, japyraǵynyń dıametri 60 santımetrge jýyqtaıdy.
Teńiz aýylyna jaqyn ornalasqan bul erekshe jer týraly buryndary kópshilik bile bermeıtin. Alaıda sońǵy jyldary BAQ-ta jarııalanǵan derekter men áleýmettik jelilerdiń áserinen bul mekenge aǵylatyn týrısterdiń sany arta tústi. Qashyqtyǵyna qaramastan, tabıǵat kórinisine tánti bolýǵa kelgender legi jyl sanap kóbeıip keledi.
Festıval aıasynda ulttyq sporttyń alty túrinen jarys ótpek. Atap aıtqanda, qazaq kúresi, qol kúresi, sadaq atý, arqan tartý, asyq atý jáne alyptar saıysy uıymdastyrylady. Jeńimpazdarǵa arnaıy syılyqtar tabystalady.
Sonymen qatar etnoaýyl boı kóterip, qolóner sheberleriniń kórmesi men ulttyq taǵamdar jármeńkesi merekeniń shyraıyn kirgizbekshi. Aıta keteıik, lotos meıramy otandyq estrada juldyzdarynyń konsertine ulasady.
