Qarjylyq monıtorıng agenttiginiń Almaty qalasy boıynsha departamenti júrgizgen tergeý barysynda «Group of the Companies TDA» jaýapkershiligi shekteýli seriktestiginiń memlekettik ýákiletti ekonomıkalyq operator mártebesine ıe bola otyryp, bul senimdi teris maqsatta paıdalanǵany anyqtalǵan. Kompanııa Qytaıdan 100-den astam konteınerdi kedendik rásimdeýsiz, ıaǵnı kontrabandalyq jolmen elimizge engizgen.
Osy qylmystyq tizbekti shyn máninde júıeli uıymdastyrylǵan ekonomıkalyq shema deýge bolady. Sebebi, tergeý nátıjesinde atalǵan kompanııanyń baqylaýyndaǵy on shaqty seriktestik mekeme arqyly jalǵan shot-faktýralar jazylyp, memlekettik bıýdjetke salyqtan jaltarý jolymen 10 mıllıard teńge kóleminde zalal keltirilgeni dáleldengen.
Memlekettik múdde men ulttyq ekonomıkanyń negizi sanalatyn salyq júıesine jasalǵan mundaı shabýyldyń zardaby bir ǵana statıstıkalyq kórsetkishpen shektelmeıdi. Bul — ádil básekelestikke, kásipkerlik ortaǵa, tipti tutynýshylardyń qaýipsizdigine de tikeleı nuqsan keltiretin áreket.
Sotqa deıingi tergeý amaldary barysynda 643 mıllıon teńge óndirilip, aıyptylardyń 1,3 mıllıard teńge turatyn taýarlaryna jáne 300 mıllıon teńge kólemindegi múlkine – onyń ishinde jer telimderi, avtokólikter, baggılar men jyljymaly shatyrlar sekildi aktıvterge – shekteý qoıylǵan. Bul memlekettiń zań aldynda eshkimniń de artyqshylyǵy joq degen qaǵıdany ustanatynyn kórsetedi.
Sot úkimimen kináli tulǵalar 1 jyl 4 aıdan 4 jyl 6 aıǵa deıingi merzimge bas bostandyǵynan aıyryldy. Sonymen qatar, olardyń múlki tárkilenetin boldy. Iske qatysy bar bir azamatqa halyqaralyq izdeý jarııalanǵany bul qylmystyń aýqymy men kúrdeliligin aıǵaqtaıdy.
Bir qyzyǵy, bul isten keıin kompanııamen áriptestik ornatqan 47 kásiporyn óz erkimen esep aıyrysýdy toqtatyp, memleket qazynasyna 240 mıllıon teńge salyq tólegen. Bul – ózge bıznes ókilderi úshin eleýli eskertý, ári memlekettiń fıskaldyq baqylaýynyń nátıjeliligin bildiredi.
