Foto: qostanay.tv
Balaqaıdyń máıiti 3,5 metr tereńdikten, jaǵalaýdan 90 metr qashyqtyqta tabylǵan.
Rýdnyı qalasynyń Tótenshe jaǵdaılar basqarmasy basshysy Azamat Aǵataıdyń málimetinshe, izdestirý jumystary úsh saǵattan asa ýaqytqa sozylyp, nátıjesinde 16 jastaǵy bozbalanyń máıiti sýdan shyǵarylǵan. Qazir sot-medısınalyq saraptamanyń qorytyndysy kútilip otyr.
Qala ákimi qaıǵyly oqıǵa boıynsha pikir bildirgen.
«Kúshin durys eseptemegen, júzip ótemin dep oılaǵan. Bos jerden bir balany joǵaltyp aldyq, óte ókinishti. Aldyn alý jumystary qajet. Shomylýǵa ruqsat etilmegen jerlerge tyıym salatyn belgiler ornatý kerek, reıdter júrgizý qajet. Bizde eki jabdyqtalǵan jaǵajaı bar, biraq bul jetkiliksiz. Bolashaqta shirkeý mańynda qosymsha jaǵajaıdyń ashylý máselesin qarastyramyz. Aldyn ala smetasyn daıyndaý kerek», dedi Rýdnyı ákimi.
Tótenshe jaǵdaılar departamenti kezekti ret:
- Tek arnaıy jabdyqtalǵan jaǵajaılarda shomylyńyz;
- Balalardy sý janynda qaraýsyz qaldyrmańyz;
- Balalarǵa sýdaǵy tártip erejelerin túsindirińiz, tereńdiktegi oıyndardyń qaýiptiligin eskertińiz;
- Mas kúıde sýǵa túspeńiz;
- Beıtanys jerlerge súńgimeńiz – sý túbinde tamyrlar, quıyndar, tereńdik aýytqýlary bolýy múmkin ekendigin eskertedi.
