Ult rýhanııatynyń kórnekti tulǵasy, túrki dúnıesiniń maqtaýly perzenti, fılologııa ǵylymdarynyń doktory, tarıh ǵylymdarynyń kandıdaty, professor, Atatúrik atyndaǵy Túrik tarıh qurymynyń tolyq múshesi Qarjaýbaı Sartqojaulynyń úsh birdeı kitabynyń tusaýkeser rásimi L.N. Gýmılev atyndaǵy Eýrazııa ulttyq ýnıversıtetinde ótti.
Keleli keńeske Májilis depýtattary, belgili ǵalymdar men qoǵam qaıratkerleri qatysty. Alǵashqy bolyp sóz alǵan ýnıversıtet rektory Erlan Sydyqov súbeli eńbekterdiń ǵumyry alda ekenin atap ótti.
«Aǵamyzdyń kól-kósir eńbekterin urpaqqa túsindire bilsek, ekinshi shyǵarmashylyq ǵumyry baıandy bolady dep oılaımyn. Tárbıe, taǵylym, shejireli jolyn ári qaraı shákirtteri jalǵastyra bersin. Siz ben biz turǵanda ǵalymnyń aýqymdy muralary jandana bereri anyq. Sondyqtan da aldymyzdaǵy kitaptardyń tusaýyn keseıik. Aq jol bolsyn, kitaptyń oqyrmandary kóp bolsyn», dedi ol.
Qarjaýbaı Sartqojauly – shyǵarmashylyq ómirinde qoǵamdyq qyzmetter atqara júrip, ádebı taqyryptarǵa da belsene qalam tartqan qaıratker. Tusaýy kesilgen «Qosh bol, apa» kitabyna ómir men ólim, saǵynysh pen syr, turmys pen taǵdyr astasqan ádebı shyǵarmalar engizilgen. Al «Tastan tamyr izdegen ǵulama» kitabynda ǵalymnyń ǵylymı-shyǵarmashylyq kelbetin, túrki dúnıesine sińirgen eńbegin keńinen ashatyn álemdik ári otandyq ǵalymdar men qalamgerlerdiń júrekjardy maqalalary, estelikteri men lebizderi toptastyrylǵan. Úshinshi kitap – «Podzemnyı mavzoleı drevnetıýrkskoı epohı Shoroon Býmbagar (Maıhan Ýýl) v Sentralnoı Mongolıı» atty monografııa.
Is-sharada belgili ǵalym, Serik Negımov Qarjaýbaı Sartqojaulynyń el rýhanııatyndaǵy orny týraly aıtty.
«Ult patrıoty, dala qazaǵy, túrkitanýshy, jazýshy Qarjaýbaı Sartqojauly kógildir ekran aldynda qıyn kúnderde «Men tilim úshin ólem!» dep kúndeı kúrkirep aıtqan edi. Sol sóz halyqtyń júreginde jattalyp qaldy. Qarjekeńniń eńbegi – memleketimizdiń ıgiligi, baılyǵy, dáýleti, ulttyq tarıhı sanamyzdy júıelendiretin ǵajaıyp bir qazyna», dedi professor.
Jıynda J.Málibekuly, B.Aıaǵan, D.Qamzabekuly, M.Ábsemet, T.Sadyqov, S.Rahmetuly, t.b. zııalylar ǵalym murasynyń mán-mańyzy týraly oı qozǵady. Sharany ǵalym, jazýshy Tursynhan Zákenuly júrgizip otyrdy. Eń tálimdi tusy, tusaýkeserge Q.Sartqojaulynyń ǵylymı áýleti bir kisideı atsalysty.
