Foto: senate.parlam.kz
Senatorlar Qarmaqshy aýdanynda Dúr Ońǵar, Iirkól jáne Tórebaı bı aýyldaryndaǵy gaz tartý jumystarynyń jaı-kúıin baqylap, bul jobalar aýyl halqynyń turmys sapasyn jaqsartýǵa baǵyttalǵanyn atap ótti. Olar shalǵaıdaǵy eldi mekender negizgi ınfraqurylymmen tolyq qamtamasyz etilýi qajet ekenin aıtty.
Sonymen qatar sapar aıasynda senatorlar kúrish óńdeýge mamandanǵan «Jańajol» JShS-de bolyp, ondaǵy tehnologııalyq úderis, eńbek jaǵdaıy jáne óndiris kórsetkishterimen tanysty. Atalǵan kásiporynnyń azyq-túlik qaýipsizdigin qamtamasyz etýdegi jáne agroónerkásip keshenin damytýdaǵy róli erekshe ataldy.
Qazaly aýdanynda depýtattar Syrdarııa ózeni arqyly ótetin kópirdiń qurylysymen tanysty. Buryn toqtap qalǵan nysan qurylysy qaıta jandanyp, qazirgi tańda jumystar qarqyndy júrgizilip jatyr.
Sapar barysynda mádenı murany saqtaý máselelerine de erekshe nazar aýdaryldy. Senatorlar Jankent aýylynda ornalasqan respýblıkalyq mańyzy bar tarıhı eskertkish mańynda jergilikti halyqpen, mádenıet jáne bilim salasynyń ókilderimen kezdesti. Kezdesý barysynda týrızmdi damytý, nysandy qaıta jańǵyrtý jáne ishki týrıstik marshrýttarǵa qosý qajettiligi talqylandy.
«Qarmaqshy jáne Qazaly aýdandarynyń tarıhı jáne mádenı áleýeti zor. Biraq adam jáne onyń kúndelikti qajettiligi, ınfraqurylymǵa qol jetimdilik, erteńgi kúnge degen senimi árqashan bizdiń nazarymyzda. Aýyldardy damytý, gazben, sýmen, jolmen jáne áleýmettik ınfraqurylymmen qamtamasyz etýdi dál osy maqsatta júıeli túrde kótere beremiz», dedi senator Rýslan Rústemov.
