Sýretti túsirgen – Maqsat Turtaev
«Ońtústik» ındýstrııalyq aımaǵynda quny 130 mlrd teńge bolatyn 96 kásiporyn ornalasqan. 3 064 adamǵa jumys orny kózdelgen. Qazir 83 kásiporyn iske qosylǵan, onda 2 785 adam eńbek etedi. Osy jobalardy iske asyrýǵa 120 mlrd teńgeniń ınvestısııasy tartyldy. 2024 jyly 847 mln teńgege 3 ınvestısııalyq joba qolǵa alynyp, 68 jańa jumys orny quryldy. Bular – polıetılen ónimderin óndiretin «Easy Pack» zaýyty, PKS markili karton shyǵaratyn «Býmprom» kásiporny jáne ónerkásiptik elektr jabdyqtary men akkýmýlıator jasaıtyn «Bereke ınvest-5».
«Tassaı» ındýstrııalyq aımaǵynda jalpy quny 95,3 mlrd teńgege 42 joba tirkelgen. 33 kásiporyn ashylyp, 2 myńnan astam adamǵa jumys tabyldy. 95,3 mlrd teńgege 3 030 jańa jumys ornymen 42 joba iske asyrylyp jatyr. Onyń ishinde jalpy quny 44,5 mlrd teńgege 33 joba iske qosylyp, onda 2 195 jumys orny ashyldy. Byltyr «Shymkent-Reklama» JShS-nyń jarnamalyq qurylymdar óndiretin jáne qyzmet kórsetetin kásiporny iske qosyldy. Munda 10 adam jumys isteıdi. Jobaǵa ınvestor 100 mln teńge ınvestısııa quıǵan.
SAÝDA-LOGISTIKALYQ ortalyǵynda 9 jobany atap ótý kerek. Olarǵa 70,5 mlrd teńge ınvestısııa jumsalǵan. 810 jumys orny qurylady dep kórsetilgen. Dál qazir onda 9 jobanyń tórteýi iske asyrylyp, 345 adam eńbekpen qamtyldy. Jumsalǵan ınvestısııa 24 mlrd teńgeden asady.
«OŃTÚSTIK» arnaıy ekonomıkalyq aımaǵynda 67,9 mlrd teńgege 41 kásiporyn salyndy. Myńnan asa adam jumys isteıdi. Byltyr kásipkerler 7,8 mlrd teńgege 4 ınvestısııalyq jobany bastap, 350-deı adamdy jumyspen qamtydy. Tórt joba dep otyrǵanymyz – «Balabi textile» JShS-nyń shulyq buıymdary óndirisi, «Cleans Fabric» JShS-nyń ylǵaldy maılyqtar shyǵaratyn kásiporny, aıaqkıim tigetin «Nappa.kz» JShS fabrıkasy jáne ylǵaldy maılyqtar óndiretin «Hayat cosmetics» JShS zaýyty. Atalǵan 4 óndiris oshaǵyn iske qosýǵa mıllıardtaǵan teńge ınvestısııa salynyp, nátıjesinde júzdegen adam qazir sonda eńbek etip jatyr.
«JULDYZ» ındýstrııalyq aımaǵynyń ınjenerlik-ınfraqurylym júıeleriniń qurylysy 90%-ǵa aıaqtaldy. Oǵan memleket qazynasynan 13,7 mlrd teńge qarajat jumsaldy. Munda keleshekte 59 zaýyt salynady. Tórt myńnan asa adam eńbek etedi. Osy maqsatty oryndaýǵa ınvestorlar 179 mlrd teńge qarjy jaratýǵa daıyn.
Al bıyl 7 kásiporyn ónim shyǵarýdy bastady. Ol úshin 39 mlrd teńge jumsaldy. Qazir kásiporyndarda 951 adam jumys istep jatyr. Bul 7 joba – «Wan Sheng Ceramic» JShS-nyń keramıkalyq taqtalary, «First Concrete Company» JShS-nyń temir-beton buıymdary, «Alem Stone» JShS-nyń asfalt óndirisi, «DSK 17» JShS-nyń úı qurylysy kombınaty, «Ońtústik Ǵımarat» JShS-nyń asfaltbeton shyǵarý jobasy, «Evro Znak» seriktestiginiń kópir jáne jol konstrýksııalaryna arnalǵan temir-beton men «Iýg Oil Pro» fırmasynyń bıtým qabyldaý, saqtaý jáne asfalt óndiristeri.
«BOZARYQ» agro-ındýstrııalyq aımaǵynyń jalpy aýmaǵy 132 gektardy quraıdy. Aımaqta jalpy quny 49,6 mlrd teńgeniń 25 jobasyn iske asyrý kózdelip otyr. Búginde atalǵan aımaqtyń ınjenerlik-ınfraqurylym jelileriniń qurylys jumystary 95%-ǵa támamdaldy. Injenerlik-ınfraqurylym jelilerin tartýǵa 12,6 mlrd teńge jumsalmaq. Kásipkerlik basqarmasynyń bergen málimetine sáıkes, qurylys jumystary bıyl tórtinshi toqsanda aıaqtalýǵa tıis. Indýstrııalyq aımaqty sýmen jabdyqtaýǵa jáne káriz júıesin júrgizýge bıýdjetten 4,7 mlrd teńge qarajat bólindi. Odan bólek, Saýda-logıstıkalyq ortalyǵyn 136 gektarǵa keńeıtý jumystary júrip jatyr. Qazir ınjenerlik-ınfraqurylymdyq jelilerdi tartýǵa tehnıkalyq ekonomıkalyq negizdeme ázirlenip, memlekettik saraptamanyń oń qorytyndysy alyndy. Jalpy, ınjenerlik ınfraqurylymǵa 8,9 mlrd teńge qajet. Oǵan logıstıkalyq ortalyqty gaz, sý, káriz, elektr júıesimen, avtomobıl, temirjolmen qamtamasyz etý jospary kiredi. Qurylys jumystary bıyl bite qoımaıdy.
«OŃTÚSTIK» arnaıy ekonomıkalyq aımaǵyn 175 gektarǵa jáne «JULDYZ» ındýstrııalyq aımaǵyn 155 gektarǵa keńeıtý úshin memleket muqtajdyǵyna 330 gektar jerdi qaıtarýdyń jumystary bastaldy deıdi kásipkerlik basqarmasynyń mamandary. Qazir 288 gektar jer ýchaskesi memleket menshigine ótip, qalǵany boıynsha baǵalaý áli bitken joq jáne sotta qaralyp jatyr. Jer ýchaskeleri tolyǵymen qaıtarylǵannan keıin qajetti ınjenerlik ınfraqurylym jobasy ázirlenbek. Sonymen qatar Energetıka jáne ınfraqurylymdy damytý basqarmasy tarapynan qýattylyǵy 100 MVt quraıtyn «Juldyz» qosalqy stansasynyń jobasy ázirlený ústinde. Joba quny shamamen 15-18 mlrd teńgeni quraıdy. Qosalqy stansa 2026-2027 jyldary iske qosylady. Sonyń nátıjesinde stansaǵa jaqyn mańdaǵy ındýstrııalyq aımaqtar tolyǵymen elektr qýatymen jabdyqtalady.
Condaı-aq jergilikti atqarýshy bılik metallýrgııa salasyndaǵy jobalardy iske asyrýǵa aýmaǵy 1 076 gektar bolatyn qalanyń ońtústik-batys baǵytynda jańa ındýstrııalyq aımaǵyn qurýǵa kiristi. Qazir ındýstrııalyq aımaq tujyrymdamasy ázirlenip, qala ákimdiginiń qaýlysy qabyldandy. Endigi kezekte energetıka jáne ınfraqurylymdy damytý basqarmasyna atalǵan aýmaqta kásiporyndarǵa kerekti ınjenerlik-ınfraqurylymǵa qosylý núktelerin anyqtap, jobalaý jumystaryn júrgizý qajet. Sonymen qatar jer ýchaskelerin memleket muqtajdyǵyna qaıtarý isi de bastalý kerek.
