PAVLODAR. 7 mamyr. Oblys ortalyǵynda Otan qorǵaýshylar merekesi kúni Soǵys jáne eńbek ardagerleri, jas sarbazdar men qala turǵyndary Dańq áskerı saıabaǵynda soǵysta qaza bolǵandarǵa arnalǵan eskertkishke gúl shoqtaryn qoıdy. Bul týraly egemen.kz tilshisi habarlady.
Soǵys kezinde qaza tapqan jaýyngerlerdi bir mınýt únsizdikpen eske aldy. Osydan bir kún buryn osy saıabaqta qala ákimdigi 7 soǵys ardagerine jańa páter kiltterin tabys etken bolatyn. Budan keıin ardagerler oblystyq mýzeıde ashylǵan «Erliktiń úlgisi» atty fotoderekti kórmemen tanysty.
Osy jerde balalar úıiniń tárbıelenýshileriniń qatysýymen «Elin qorǵaý – erge sert» atty konsert qoıyldy. Odan keıin ardagerler ortalyq alańda ornalasqan úlken monıtor ekrannan Astanadaǵy áskerı paradtyń tikeleı kórsetilimin tamashalady.
Áskerı paradty kórýge monıtor aldyna qala turǵyndary, qoldaryna jalaýsha, sharlar kótergen jastar jınaldy. «Biz ekran arqyly elimizdiń áskerı qýatynyń qanshalyqty myqty, tegerýindi kúshke aınalǵanyn kórip tańqaldyq. Búgingi áskerı sherý elimizdiń armııasynyń kúsh-qýatyn pash etti. Astanada Otan qorǵaýshylar kúni men Jeńistiń 70 jyldyǵyna arnalǵan parad bizdiń esimizde máńgi qalady», deıdi «Zamandas» ardagerler uıymynyń basshysy Qabıbollla Shákárimov.
Sonymen birge Vıtalıı Han, Pavel Malsev, Mate Baktııarov sııaqty soǵys jáne eńbek ardagerleri de tańdanystaryn jasyrmaı, elimizdiń áskerı kúshiniń senimdi qolda, myǵym ekendikterine qýanatyndaryn jetkizdi. Tikeleı kórsetilimnen soń, soǵys jáne eńbek ardagerleri, qala turǵyndary ortalyq alańdaǵy merekelik konsertti tamashalady. Soǵys jyldaryndaǵy ánderdi shyrqap, «Jeńis valsin» bıledi.
Odan keıin «Dostyq úıinde» «Jenimpazdar-Pobedıtelı» atty Jeńistiń 70 jyldyǵyna arnalǵan estelik jańa kitaptyń tusaýkeserine qatysty.
Qazir oblys ortalyǵynda «Jeńiske deıin 30 kún» atty sharalar ótýde. Keshke Júsipbek Aımaýytov atyndaǵy mýzykalyq drama teatrynda soǵys taqyrybyna arnalǵan «Kútpegen kezdesý» atty qoıylym ótedi.
Farıda Byqaı.
Derek, sýret: egemen.kz
