Foto: astana-akshamy.kz
Osy ýaqyt aralyǵynda barlyq qatysýshy sanaq.gov.kz saıtynda onlaın formatta sanaqtan óte alady. Saıtta aýyl sharýashylyǵy óndirýshileri men úı sharýashylyqtaryna arnalǵan eki túrli saýalnama paraǵy bolady.
Ulttyq statıstıka bıýrosynyń málimetinshe, ósimdik sharýashylyǵy, mal sharýashylyǵy nemese balyq sharýashylyǵymen aınalysatyn zańdy tulǵalar, jeke kásipkerler men sharýa (fermer) qojalyqtary 2-AShK/ShFQ sanaq paraǵyn toltyrýy tıis. Bul saýalnamada toǵyz bólimnen turatyn 29 suraq qamtylǵan. Onda jer ýchaskeleriniń kólemi, olardyń qalaı paıdalanylyp jatqany, sýarý tásilderi, jerdiń menshikke nemese jalǵa alynǵany týraly málimetter kórsetilýi kerek.
Sondaı-aq saýalnamada sharýashylyqtaǵy mal, qus, balyq sany, qoldanylatyn tehnıka, qural-jabdyqtar, qoımalar, saqtaý oryndary men basqa da qajetti nysandar týraly aqparat suralady. Qatysýshylar tyńaıtqyshtardy, ósimdikterdi qorǵaý quraldaryn qoldaný, organıkalyq ónim óndirý, aýyl sharýashylyǵy ónimderin ótkizý, sondaı-aq jumysshylardyń sany men olardyń sıpattamasy jóninde de málimet beredi.
Baqsha egetin nemese mal men qus ustaıtyn úı sharýashylyqtary da sanaqqa qatysady. Olar úshin 3-JQSh saýalnama paraǵy qarastyrylǵan. Bul saýalnamada qandaı daqyldar ósiriletini, qansha mal men qus ustaıtyny, jaıylymdardy qoldanatyny, mal ustaýǵa arnalǵan qurylystardyń bar-joǵy, sondaı-aq ónimniń satylatyny nemese jeke tutynýǵa paıdalanylatyny týraly málimet beriledi. Úı sharýashylyqtaryna arnalǵan saýalnama 8 bólimnen jáne 22 suraqtan turady.
Bıýro barlyq usynylatyn aqparattyń qupııalylyǵyn saqtap, derekter «Memlekettik statıstıka týraly» zańymen qorǵalatynyn jáne salyq nemese basqa memlekettik organdarǵa berilmeıtinin málimdedi.
Sanaq aıasynda elimiz boıynsha shamamen 300 myń aýyl sharýashylyǵy uıymyn jáne 2 mln úı sharýashylyǵyn qamtý josparlanǵan.
Birinshi kezeńnen keıin saýalnamany toltyrmaǵandardyń tizimin jasaý úshin 20 kún ishinde málimetter óńdeledi.
20 qyrkúıekten 20 qazan 30 kún aralyǵynda, sanaq qyzmetkerleri jeke áńgimelesý ádisi jáne planshetterdi qoldaný arqyly sanaq júrgizedi.
Aıta keteıik, buǵan deıin elimizde aýyl sharýashylyǵy sanaǵy 2006-2007 jyldary ótken bolatyn.
