Foto: Úkimet
Kólik mınıstrliginiń málimetinshe, bıylǵy birinshi jartyjyldyqta qazaqstandyq avıakompanııalar 7,2 mln jolaýshy tasymaldaǵan. Bul ótken jyldyń sáıkes kezeńimen salystyrǵanda 6%-ǵa artyq. Áýejaılarda jolaýshylarǵa qyzmet kórsetý kólemi 14,4 mln adamǵa deıin artqan. Qazirgi ýaqytta ishki avıatasymaldar jalpy jıiligi aptasyna 849 reıs bolatyn 61 baǵdar boıynsha oryndalyp júr.
Keıingi jyldary Qazaqstanda 20 ushý-qoný jolaǵy, 19 termınal rekonstrýksııalanyp, Túrkistanda jańa áýejaı salyndy. Kólik mınıstri Nurlan Saýranbaev bıyl áýe kemeleri parkin 16 birlikke tolyqtyrý kútilip otyrǵanyn, onyń 6-ýy búginde satyp alynǵanyn baıandady. Jalpy, 2030 jyldyń sońyna deıin flot 221 birlikke deıin ulǵaıtylady. Sondaı-aq 2025 jyly 36 baǵdardy ashý jáne jańartý josparlanǵan. Investısııalyq baǵdarlamalar sheńberinde avıasııa salasyna barlyǵy shamamen $2,9 mlrd tartý kózdelip otyr. Qarajatty iri jobalardy júzege asyrýǵa, atap aıtqanda, Katonqaraǵaı, Zaısan, Kendirli, sondaı-aq Arqalyq týrıstik aımaqtarynda jańa áýejaılar salý, 10 ushý-qoný jolaǵy men 10 termınaldy rekonstrýksııalaý, arnaıy tehnıka parkin jańartý jumystaryna jumsalmaq.
Jıynda júk avıakompanııasyn qurý jónindegi bastamanyń iske asyrylý barysy qaraldy. Joba álemdik júk avıatasymaly naryǵynyń turaqty ósýine baılanysty qolǵa alynǵaly otyr. Búgingi tańda ondaǵy kólem 57,7 mln tonnany quraıdy. Bul rette tasymaldardyń shamamen 15%-y Qazaqstannyń áýe keńistigi arqyly ótedi.
«Samuryq-Qazyna» UÁQ» AQ basqarma tóraǵasy Nurlan Jaqypov álemdik tájirıbege sáıkes bastapqy kezeńde úsh áýe kemesin jalǵa alyp, keıinnen flotty on birlikke deıin keńeıtý kózdelip otyrǵanyn baıandady. Ulttyq júk avıatasymaldaýshynyń operatorlyǵymen alǵashqy reısti iske qosý 2026 jyldyń basyna júzege asyrý josparlanyp otyr. Joba ózin- ózi aqtaýy úshin otynmen qamtamasyz etýdiń kepildendirilgen kólemi qarastyrylyp jatyr.
Premer-mınıstr júk avıatasymaldaýshysyn qurý boıynsha barlyq daıyndyq prosesin barynsha jedeldetýdi tapsyrdy.
«Prezıdent Qasym-Jomart Toqaev Qazaqstandy aımaqtaǵy jetekshi avıasııalyq hab retinde kúsheıtý mindetin qoıdy. Qazirgi tańda áýejaı ınfraqurylymyn jáne ishki tasymaldardy damytý boıynsha keshendi jumystar júrgizýde. Sonyń ishinde júk avıatasymaldaýshyny qurý – negizgi jobalardyń biri. Ony júzege asyrý tranzıttik júk aǵyndaryn Qazaqstanǵa qaraı burýǵa múmkindik beredi jáne júk avıatasymaly naryǵyndaǵy bizdiń ustanymymyzdy kúsheıtedi», dedi Oljas Bektenov.
