Foto: Ashyq derekkóz
Qala ákimdigi atalǵan usynysty máslıhattyń qaraýyna jibergen. Kóshelerge ǵylym, mádenıet, óner salasynda aıryqsha eńbek sińirgen tanymal tulǵalardyń esimderi berilmek.
Atap aıtqanda, Áýezov aýdanyndaǵy kóshelerge belgili ǵalymdar, til mamandary — akademık Ábdýálı Qaıdar men Rábıǵa Syzdyqtyń esimderi beriledi. Sondaı-aq, osy aýdanda álemdegi tuńǵysh balalarǵa arnalǵan mýzykalyq teatrdyń negizin qalaýshy Natalıa Sastyń esimi de bir kóshege berilmek.
Bostandyq aýdanyndaǵy bir kóshege 2018 jyly qaıǵyly jaǵdaıda qaza tapqan áıgili mánerlep syrǵanaýshy Denıs Tenniń esimi beriledi. Sonymen qatar, qazaq anımasııasynyń negizin qalaýshylardyń biri — Ámen Qaıdarovtyń esimi de osy aýdannyń bir kóshesine berilýi josparlanǵan.
Alataý aýdanynda kóshelerge abaıtanýdy ǵylymı negizdeýshi, shákárimtanýdyń negizin qalaýshy, tekstolog Qaıym Muhamedhanovtyń, sondaı-aq vetnam halqynyń bostandyǵy jolynda kúresken memleket qaıratkeri Ho Shı Mınniń esimderin berý usynylǵan.
Esterińizge sala keteıik, ótken jyly da Almaty qalasynyń máslıhaty megapolıstegi birqatar kóshelerdi qaıta ataý týraly usynysty qoldaǵan bolatyn. Sonyń nátıjesinde qalada Ermek Serkebaev, Vladımır Tolokonnıkov, Eskendir Hasanǵalıev jáne Iýrıı Pomeransev sııaqty óner maıtalmandarynyń esimderimen atalǵan jańa kósheler paıda boldy.
