Jıyn barysynda oblystyq mádenıet, tilderdi damytý jáne arhıv isi basqarmasynyń basshysy Qýanyshbek Muqanǵalıev memlekettik tildi damytý barysynda óńirde jasalyp jatqan jumystardy atap ótti. Bıyl jyl basynda ǵana «Qazaq tili» qoǵamynyń oblystyq fılıalyna tóraǵa bolyp taǵaıyndalǵan Aıdarbek Aqbolatov fılıaldyń osy kezge deıin atqarǵan jumysy jáne aldaǵy jartyjyldyqqa arnalǵan jospar jaıly baıandady. Al astanadan kelgen halyqaralyq «Qazaq tili» qoǵamynyń vıse-prezıdenti Sherýbaı Qurmanbaıuly memlekettik til – el birliginiń negizi ekenin aıtyp, óńirde jáne elimizde kezdesip jatqan keıbir qıyndyqtarǵa toqtaldy.
- Halyqaralyq «Qazaq tili» qoǵamy qurylǵaly beri ótken 40 jylǵa taıaý ýaqytta búkilqazaqtyq sıpat alyp, erekshe órlegen kezeńi de, kerisinshe bar-joǵy belgisiz bolyp qalǵan ýaqyty da boldy. Endigi ýaqytta til máselesin urandatpaı, jalaýlatpaı, naǵyz erikti, yntaly mamandardyń kómegimen jumys isteıtin bolamyz. Búginde is basyna JOO ǵalymdary, til mamandary kóbirek tartylyp jatqany sondyqtan. Eń áýeli qazaq tilin oqytý ádistemesin jolǵa qoıyp, tildiń mazmunyn baıytýǵa kúsh salamyz. Sońǵy kezde áıgili Dısneı korporasııasy shyǵarǵan mýltfılmderdiń qazaq tiline aýdarylýy osynyń nátıjesi. Sondaı-aq tilimizdi zamanaýı tehnologııalyq úrdiske saı etip damytý máselesi de ózekti bolyp tur. Til máselesinde Aqjaıyq óńirinde de keıbir túıtkildi jáıtterdiń bar ekenin bilemin. Bizdiń kózqarasymyz – bul salada kıkiljiń týdyrmaı, aldyn-ala zań aıasynda saýatty jumys isteý qajet, - dedi Sherýbaı Qurmanbaıuly.
Jıynǵa qatysqan zııaly qaýym ókilderi de ortaq máselege oı qosyp, óz pikirin aıtty. Otyrystyń sońynda halyqaralyq «Qazaq tili» qoǵamy men Batys Qazaqstan oblysynyń mádenıet, tilderdi damytý jáne arhıv isi basqarmasy arasynda memlekettik tildi damytý boıynsha ózara yntymaqtastyq týraly memorandýmǵa qol qoıyldy.
Batys Qazaqstan oblysy
