Sýretti túsirgen – Jumabaı Musabek
О́ńirde 70-ten astam etnos ókili turady. Olardyń bári oblys ortalyǵynda ornalasqan Dostyq úıimen tyǵyz baılanysta hám ulttyq merekelerde belsendi qyzmet kórsetedi. Bul týyndynyń ómirge kelýine de olardyń shynaıy qarym-qatynasy sebep bolǵan. Art-nysan Qazaqstan halqy Assambleıasynyń qoǵamdaǵy turaqtylyq pen tatýlyqty saqtaý jolyndaǵy mańyzdy rólin kórkem beıneleıdi.
Aýqymdy muralda túrli etnos ókilderiniń kelbeti, ulttyq naqyshtaǵy oıý-órnekter men dostyqty bildiretin belgiler beınelengen. Sonymen qatar Assambleıanyń 30 jyldyq mereıtoıyna qatysty elementter de kórinis tapqan. Týyndyny jas sýretshiler toby birigip salǵan. Jobanyń ıdeıalyq negizi men kórkemdik tujyrymyn Jetisý oblystyq Qazaqstan halqy Assambleıasy men óńirdegi shyǵarmashylyq uıymdar birlese daıyndaǵan.
«Bıylǵy mereıtoı «Birlik pen kelisimniń 30 jyly» degen uranmen atalyp ótip jatyr. Osyǵan oraı, oblys kóleminde túrli formattaǵy is-sharalar uıymdastyrylyp jatyr. Solardyń biri – osy mural. Qabyrǵa sýretinde etnostar arasyndaǵy ortaq bolashaq, ulttyq mura men qundylyqtardy biriktiretin kórkem beıneler jınaqtalǵan. Árbir detal – halqymyzdyń tarıhyna, mádenıeti men birligine kórsetilgen iltıpat», deıdi oblystyq «Qoǵamdyq kelisim» mekemesiniń basshysy Erkebulan Aqbolatov.
Mural salynǵan «Qaratal» shaǵyn aýdanynyń 18/2-úı turǵyny Olesıa Alahverdıeva da bul ıgi bastamaǵa oń baǵasyn berdi.
«Mundaı kórkem týyndylar qalamyzdyń ajaryn ashyp qana qoımaı, tárbıelik máni zor oıdy jetkizedi. Bul art-nysan halqymyzdyń beıbit ómir súrýge degen umtylysyn, mádenıet pen kelisimge negizdelgen birligin naqty túrde aıshyqtap tur», dedi ol.
Jetisý oblysy
