Oǵan Premer-mınıstrdiń orynbasary Ermek Kósherbaev, Densaýlyq saqtaý mınıstri Aqmaral Álnazarova, Ishki ister mınıstri Erjan Sádenov jáne Ádilet vıse-mınıstri Laýra Mersalımova qatysty.
Densaýlyq saqtaý mınıstrliginiń málimetinshe, 2019 jyldan beri elimizde dárigerlerge, feldsherlerge, medbıkelerge jáne basqa da densaýlyq saqtaý qyzmetkerlerine jasalǵan shabýyldardyń 170-ten astam faktisi tirkelgen.
Densaýlyq saqtaý mınıstri habarlaǵandaı, dárigerlerge jasalǵan shabýyldardy quqyq qorǵaý organdary qyzmetkerleriniń jeke basyna qaýip tóndirý áreketimen teńestirý, sondaı-aq medıkterge smart-beınejetondar berý, aýrýhanalarda keshendi kúzet júıelerin engizý, qabyldaý bólimshelerinde táýlik boıǵy polısııa beketterin ornalastyrýdy kózdeıtin birqatar zańnamalyq túzetýlerdi daıyndaý bastalǵan.
Oljas Bektenov medısına qyzmetkerleriniń qaýipsizdigin qamtamasyz etýdiń mańyzdylyǵyna nazar aýdardy.
«Memleket basshysynyń tapsyrmasynyń oryndalýyn qamtamasyz etý qajet. Dárigerlerge shabýyl jasalǵan mundaı oqıǵalar quqyqtyq ádistermen qatań túrde toqtatylýy kerek. Osyǵan baılanysty densaýlyq saqtaý, ishki ister, ádilet mınıstrlikterine on kún merzim ishinde qyzmettik mindetterin atqarý kezinde medısına qyzmetkerlerine qatysty zorlyq-zombylyq jasalǵany úshin qylmystyq jaza qarastyrý boıynsha zańnamalyq túzetýler ázirlep, engizýdi tapsyramyn», dedi Premer-mınıstr.
Ishki ister mınıstriniń málimetinshe, aýrýhanalar men perınataldyq ortalyqtardyń qabyldaý bólmelerinde táýlik boıǵy polısııa beketteri qoıylǵan. Barlyǵy 115 densaýlyq saqtaý nysany qorǵaýǵa alyndy. Kıkiljińderge jedel den qoıý maqsatynda marshrýttyq patrýlder kórsetilgen mekemelerge jaqyn ornalastyryldy. Qazirgi ýaqytta medısınalyq mekemelerde qaýipsizdikti qamtamasyz etý boıynsha jekelegen sharalar qabyldandy.
Budan bólek, halyq arasynda profılaktıkalyq ári túsindirý jumystaryn kúsheıtý tapsyryldy.
