Júk avıatasymalynyń mindeti men múmkindigi

Basqosýda azamattyq avıasııany damytý, jolaýshylar men júk tasy­malynyń ósý qarqyny, jańa baǵyt­tardyń ashylýy, áýejaı ınfra­qurylymyn jańartý, sonymen qatar ulttyq júk avıatasymaldaýshyny qurý bastamasy jan-jaqty talqylandy.

Premer-mınıstrdiń aıtýynsha, eldiń geogra­fııalyq ornalasýy – tran­zıttik jáne júk tasymaldaý salasynda úlken múm­kindikterge jol ashady. Osy áleýetti tıimdi paıdalaný úshin elde avıasııa salasyn keshendi damytý kózdelip otyr.

– «Prezıdent Qasym-Jomart Toqaev Qazaq­standy aımaqtaǵy jetekshi avıa­sııalyq hab retinde kúsheıtý mindetin qoıdy. Qazir áýejaı ınfra­qu­rylymyn jáne ishki tasymaldardy damytý boıyn­sha keshendi jumystar júrgizilýde. So­nyń ishinde júk avıatasymaldaýshyny qurý – negizgi jobalardyń biri. Ony júzege asyrý tranzıttik júk aǵyndaryn Qazaqstanǵa qaraı burýǵa múmkindik be­re­di jáne júk avıata­sy­maly naryǵyndaǵy biz­diń ustanymymyzdy kú­sheıtedi», dedi Premer-mınıstr.

Kólik mınıstrliginiń deregi boıynsha, 2025 jyldyń alǵashqy jarty­jyldyǵynda otandyq avıa­kompanııalar 7,2 mln jolaýshy tasymaldaǵan. Bul kórsetkish ótken jyl­dyń sáıkes kezeńimen salystyrǵanda 6%-ǵa kóp. Sonymen qatar eldegi áýe­jaılar arqyly qyzmet kór­setilgen jolaýshylar sany 14,4 mln adamǵa jetken.

Qazir ishki avıatasymaldar aptasyna 849 reıs jıi­ligimen 61 baǵyt boıyn­sha oryndalýda. Bul ishki týrızm men óńirlik baılanystyń artyp kele jatqanyn aıǵaqtaıdy.

Kólik mınıstri Nurlan Saýran­baevtyń aıtýynsha, keıingi jyldary elimizde 20 ushý-qoný jolaǵy men 19 áýejaı termınaly rekonstrýk­sııalanǵan. Túrkistan qalasynda jańa áýejaı salyndy. Bıyl áýe kemeleri parkin 16 birlikke tolyqtyrý josparlanyp otyr, sonyń altaýy qazirdiń ózinde satyp alynǵan.

Jalpy alǵanda, 2030 jylǵa deıin elimizdiń áýe floty 221 ushaqqa deıin jetkiziledi. 2025 jyly 36 jańa baǵytty ashý ári qaıta jańǵyrtý kózdelgen.

Investısııalyq jobalar sheń­berinde avıasııa salasyna shamamen 2,9 mlrd dollar tartylmaq. Bul qa­ra­jat Katonqaraǵaı, Zaı­san, Kendirli men Ar­qalyq sııaqty týrıstik aı­maq­tarda jańa áýejaı salýǵa, 10 ushý-qoný jola­ǵyn jáne 10 termınaldy qaıta jańartýǵa, arnaıy tehnıka parkin jańartýǵa baǵyttalady.

Jıynnyń negizgi ta­qyryptarynyń biri – elimizde ulttyq júk avıa­ta­symaldaýshyny qurý. Bul bastama álemdik na­ryqtaǵy júk tasymaly kó­leminiń únemi artyp kele jatqanymen baılanysty.

Búginde álem boıynsha áýe júk tasymalynyń kó­lemi 57,7 mln tonnany qu­raıdy. Osy kólemniń 15%-y Qazaqstannyń áýe keńis­tigi arqyly ótetinin esker­sek, bul naryqqa bel­sene qa­tysý elimizdiń tran­zıttik áleýe­tin arttyrary sózsiz.

«Samuryq-Qazyna» Ult­tyq ál-aýqat qorynyń basqarma tóraǵasy Nurlan Jaqypovtyń aıtýynsha, joba birneshe kezeńmen júzege asady:

«Álemdik tájirıbege súıene otyryp, bastapqy kezeńde úsh áýe kemesin jalǵa alyp, keıinnen flotty on birlikke deıin keńeıtý kózdelip otyr. Ulttyq júk avıatasymaldaýshynyń al­ǵashqy reısi 2026 jyldyń basynda júzege asady. Joba ózin-ózi aqtaýy úshin otyn­men qamtamasyz etýdiń kepil­dendirilgen kólemi qa­ras­tyrylyp jatyr», dedi ol.

Premer-mınıstr bul jobany iske asyrýda daıyndyq jumystaryn jedeldetýdi tapsyrdy.