Aýrýdyń taralý geografııasy keńeıip keledi. DDSU ókili Dıana Rohas Alvarestiń málimetinshe, vırýs 2025 jyldyń basynda Úndi muhıty aımaǵynda – Reıýnon, Maıotta jáne Mavrıkıı araldarynda tirkelip, keıin Madagaskar, Somalı, Kenııa, Ońtústik-Shyǵys Azııa jáne Úndistanǵa taraǵan. Qazirgi tańda Eýropada da indet belgileri anyqtalyp otyr.
«1 mamyrdan beri Fransııada 800-ge jýyq ákelingen jaǵdaı tirkeldi. Eldiń ońtústiginde vırýs endemııalyq aımaqqa barmaı-aq, jergilikti jolaq masalar arqyly taraǵan. Mundaı jaǵdaı jaqynda Italııada da tirkeldi», dedi DDSU ókili.
Chıkýngýnıa vırýsy joǵary temperatýra, býyn aýrýy jáne keı jaǵdaıda uzaqqa sozylatyn asqynýlarmen sıpattalady. Aýrýǵa qarsy arnaıy em joq. Ol kóbine Aedes túrindegi jolaq masalar arqyly juǵady. Bul masalar denge men zıka vırýstaryn da tasymaldaıdy jáne kúndiz shaǵatynymen erekshelenedi.
Sarapshylardyń aıtýynsha, eń tıimdi aldyn alý sharalary repellentter qoldaný, uzyn jeńdi jáne jabyq kıim kııý.
Chıkýngýnıa vırýsynyń sońǵy iri órshýi 2004-2005 jyldary tirkelgen bolatyn. Ol kezde aýrý negizinen shaǵyn araldyq aýmaqtarda taralyp, jarty mıllıonǵa jýyq adam aýyrǵan.
DDSU indettiń jahandyq densaýlyqqa qaýip tóndiretinin eskertip otyr. Sondyqtan, azamattar óz qaýipsizdigine mán berip, masa shaǵýynan saqtaný sharalaryn kúsheıtkeni jón.
