Bıylǵy baıqaýǵa álemniń túkpir-túkpirinen on myńǵa jýyq qatysýshy ótinish joldaǵan. Solardyń ishinen tek 10 esse ǵana fınaldyq kezeńge ótip, The New York Times oqyrmandaryna usynyldy.
Farıza baıqaýǵa usynǵan ashyq hatynda qazaq qoǵamyndaǵy qyz balalarǵa qoıylatyn esimder dástúrin taldap, osy áleýmettik-mádenı fenomenniń búgingi qoǵamdaǵy kórinisin sıpattaǵan. Ol bul taqyrypty úlkenderdiń áńgimelerinen, dostarynyń tájirıbesinen, sondaı-aq áleýmettik jelilerdegi pikirtalastardan keıin tereńirek uǵynǵanyn aıtady.
«Burynǵy jeńimpazdardyń hattaryn oqyp shyqqannan keıin, men de ózim úshin mańyzdy taqyrypty kótergim keldi. Qyz balaǵa qoıylatyn esim – jaı ǵana sóz emes, ol onyń bolashaǵyna áser etýi múmkin dástúrdiń kórinisi. Osy jaıt meni qatty oılandyrdy», deıdi Farıza.
Baıqaý erejesine sáıkes, ár qatysýshy naqty bir adamǵa nemese topqa baǵyttalǵan ashyq hat jazýy tıis. Mundaı janrdaǵy esse qoǵamdaǵy mańyzdy máselelerdi qozǵap, oqyrmandy oılanýǵa, áreket etýge yntalandyrýy qajet. Sonymen qatar, avtordan tek aqparat berip qana qoımaı, tereń emosııalyq áser qaldyra bilý de talap etiledi. Farızanyń essesi osy talaptarǵa tolyq saı kelip, qazylar alqasynyń erekshe nazaryn aýdartty.
Aıta ketý kerek, Farıza Fazyl buǵan deıin de túrli halyqaralyq bilim saıystaryna qatysyp, joǵary nátıjelerge qol jetkizgen. 2025 jyly ótken Infomatrix Asia baıqaýynda ekinshi oryn ıelense, Technovation Girls jobasynda Qazaqstan atynan jartylaı fınalǵa deıin jetken.
Gýmanıtarlyq baǵyttaǵy bul jetistikterine qaramastan, Farıza bolashaǵyn ǵylymmen, naqtyraq aıtqanda – bıomedısınalyq ınjenerııa salasymen baılanystyrady.
«Esse, maqala jazý maǵan unaıdy. Bul – ishki jan dúnıemdi, shynaıy tolǵandyratyn taqyrypty erkin jetkizýdiń joly. Biraq bolashaqta men ǵylym arqyly naqty ózgerister jasaǵym keledi», deıdi jas talapker.
Eske salsaq, buǵan deıin The New York Times betterinde elimizden shyqqan azamattardyń jazbalary sırek jarııalanǵan. Bul joly ortamyzdan shyqqan jas oqýshynyń ózekti taqyrypqa jazǵan tereń tolǵanysy halyqaralyq deńgeıde moıyndalyp otyr.
