Foto: Vıdeodan alynǵan kadr
Apatqa ushyraǵan áýe kemesi «Angara» áýe kompanııasyna tıesili bolǵan. Ol Habarovsk – Blagoveshensk – Tynda baǵyty boıynsha reıs oryndaǵan. Ushaq Tynda qalasyna qoný kezinde apatqa ushyraǵan. Áýe kemesi áýejaıǵa birneshe shaqyrym qalǵanda radıobaılanysqa shyqpaı qalǵan. Alǵashqy qoný áreketi sátsiz aıaqtalyp, ushaq ekinshi aınalymǵa ketkennen keıin radardan joǵalyp ketken. Keıin belgili bolǵandaı, áýe kemesi taýly aımaqtaǵy bir jotanyń etegine soǵylyp, jerge qulaǵan.
Resmı derekterge sáıkes, ushaq bortynda 49 adam bolǵan, olardyń altaýy ekıpaj músheleri, qalǵan 43-i jolaýshylar, onyń ishinde bes bala bar. Amýr oblysynyń Azamattyq qorǵanys jáne órt qaýipsizdigin qamtamasyz etý ortalyǵynyń málimetinshe, apat ornyna áýeden júrgizilgen sholý barysynda tiri qalǵandar anyqtalmaǵan. Alaıda, jerdegi izdeý jumystary barysynda jaǵdaı naqtylanýy múmkin.
Ushaqtyń synyqtary Tynda qalasynan 16 shaqyrym jerden tabylǵan. Telegram-arnalarda jarııalanǵan aqparat boıynsha, ushaqtyń qaldyqtary jarty shaqyrym aýmaqqa shashylyp ketken. Reseıdiń Tótenshe jaǵdaılar mınıstrligi apat ornynan ushaqtyń janyp jatqan fıýzelıajy tabylǵanyn rastaǵan.
Qazirgi ýaqytta tergeý amaldary bastalyp, oqıǵanyń mán-jaıy anyqtalyp jatyr.
