Soltústik Qazaqstanda kembaǵal jandar dalada qalatyn túri bar

PETROPAVL. 19 naýryz.  Qyzyljar aýdanyna qarasty Bolshaıa malyshka aýylynda bir úıdi panalap júrgen 20 adam   qaıda bararlaryn bilmeı áýre-sarsańǵa túsip júr. Bul týraly  egemen tilshisi habarlady. Kezbe jáne jarymjan adamdar bul eldi mekendi  bir jylǵa jýyq qonys etip kelgen.  Olardy osynda oblys ortalyǵyndaǵy qaıyrymdylyq qorlarynyń birine jetekshilik etetin  Denıs  Nasretdınov ornalastyrypty. Birazynyń  qujattaryn túgendep, keıbiriniń otbasylaryna oralýyna  járdemdesipti.  53 jastaǵy  Sergeı Lysenko–birinshi toptaǵy múgedek. Osydan birjarym jyl buryn jol apatyna ushyrap, eki  aıaǵyn kesýge týra kelgen.  Dalada qańǵyp júrgen jerinen Denıs qolynan jetelep ákelipti. «Bul úıdi Denıs bir tanysynan  surap alyp, bárimizdi ornalastyrǵan bolatyn. Ol adamgershiligine rahmet! Endi  baspananyń zańdy ıesi basqa bireýge  satyp jiberip, shyq-shyqtyń astyna alyp jatyr. Bir-birimizge ábden baýyr basyp, tártipke de, tazalyqqa da úırenip qalǵan edik. Alda ne kútip turǵanyn bilmeımiz. Baıaǵy  qańǵybastyq taz qalpymyzǵa qaıtadan túsetin shyǵarmyz»,–deıdi Sergeı nalyp. Aralarynda baǵa-shaǵalarymen qaýyshqandary bar. Alaıda, 8 múgedek,  4  kezbe jannyń  keleshek taǵdyry belgisiz. Bular bir shańyraq astynda  araq ishpeýdi,  temeki tartpaýdy ómir saltyna aınaldyrǵan.  Tipti  bir kásipker eki toraı satyp áperip, qosalqy sharýashylyqpen aınalysýǵa da den qoıǵan. Tabıǵaty ásem eldi mekennen baspana satyp alýǵa jaǵdaılary joq miskin jandar  jergilikti bılikke qaraılaıdy. Olar bolsa,  demeýshiler tabylyp qalar dep úmittendirip  qoıady. О́mir Esqalı. Derek: egemen.kz Sýret: egemen.kz