Fılm aty ańyzǵa aınalǵan "Dos-Muqasan" ansambliniń qurylý tarıhyn baıandaıdy. Polıtehnıkalyq ınstıtýttyń stýdentteri qurǵan toptyń shyǵarmashylyq joly, keńestik kezeńdegi shekteýler, óner men ǵylym arasyndaǵy tańdaý, qoǵam tarapynan kórsetilgen qysym syndy oqıǵalar týyndyda kórinis tapqan. Fılm ssenarııin Efrat Sháripov jazǵan. Prodıýseri – Aıgúl Baıbek.
Kınotýyndy QR Mádenıet jáne aqparat mınıstrligi men Ulttyq kınony qoldaý memlekettik ortalyǵynyń qoldaýymen túsirilgen. Tarıhı shyndyqqa saı bolýy úshin ansambldiń túpnusqa músheleri Murat Qusaıynov pen Dosym Súleımenov keńesshi retinde qatysqan.
Fılmniń Bakýdegi premerasy aıasynda ázerbaıjandyq mýzykanttar men ánshilerdiń qatysýymen konserttik baǵdarlama uıymdastyryldy. Bul shara Qazaqstan men Ázerbaıjan arasyndaǵy mádenı qarym-qatynastyń damyp kele jatqanyn kórsetti.
Keshke Qazaqstannyń Ázerbaıjandaǵy Elshisi Álim Baıel, shyǵarmashylyq jáne ǵylymı zııaly qaýym ókilderi, dıplomatııalyq korpýs músheleri, BAQ ókilderi men qazaq dıasporasy qatysty.
Aıta keteıik, Qazaqstan kınosynyń aılyǵy aıasynda Bakýde taǵy birneshe otandyq fılmderdiń kórsetilimi ótedi. Is-sharany QR Mádenıet jáne aqparat mınıstrliginiń qoldaýymen Ulttyq kınony qoldaý memlekettik ortalyǵy uıymdastyryp otyr.
