Ǵun sadaǵyna qaraǵanda saqtardyki shaǵyn ári qysqa, jumsaq bolǵandyqtan, at ústinen atýǵa qolaıly. Iаǵnı saqtar ǵun sadaǵyn kishireıtip jasaý arqyly at ústinen atýǵa yńǵaıly túrin dúnıege ákelgen.
Saq jáne ǵun sadaǵynyń aıyrmasy kóp. Saq sadaǵynyń uzyndyǵy 0,6–0,8 metr bolsa, ǵun sadaǵy 1,2–1,6 metr. Basty aıyrmashylyǵy – saq sadaǵynyń suǵy qysqa, ǵun sadaǵynyń suǵy uzyn bolady. Ǵun sadaǵy – saq sadaǵyna qaraǵanda úlken ári qýatty.
Keıbir batystyq derekkózder bul sadaqty «skıf sadaǵy» dep kórsetedi. Qurylymy týraly qazaq qarýtanýshysy, etnograf Qalıolla Ahmetjan sadaq birneshe bólek materıaldan qurastyrylyp, olar taramyspen bekitilgen deıdi. Iаǵnı mundaı sadaq ádettegi jaǵdaıda keri ıilip turady. Al qoldanǵan kezde serippesi asa qýatty bolǵan. Sadaqtyń uzyndyǵy shamamen 60–80 sm, oǵynyń uzyndyǵy 60–70 sm bolǵany týraly jazady.
V–VI ǵasyrlarda dara ulys quryp, jurtty aýzyna qaratqan túrkiler jasaǵan sadaq ta osy sadaqtyń jalǵasy. Túrkiler sadaqtyń serpini qatty bolý úshin ǵundardykin sál kishireıtip, at ústinen atýǵa yńǵaılap, ýaqyt óte kele sadaqtyń suǵy men ıininiń de ishi-syrtyna jáne baýyr-jonyna múıiz japsyrma qaptap, jetildiredi.
Onyń syrtynda kóne túrkiler temir qortýmen aınalysqanyn bilemiz. Soǵan qaraǵanda sadaq jebeleri temirden quıylyp, jete jasalyp túrlengeni anyq. Zertteýshiler túrki sadaǵynyń uzyndyǵy 120-140 sm, eń bastysy, qurama – kúrdeli sadaq paıdalanǵany jaıly derek keltiredi.
