Mereıtoılyq forýmǵa AQSh, Eýropa, Azııa, TMD elderi, Taıaý Shyǵystaǵy jetekshi neırohırýrgterdi qosa alǵanda, 20 elden 400-den astam delegat qatysty. Eki kúnge ulasqan kongress neırohırýrgııa salasyndaǵy tanymal kóshbasshy, Ýolter Dendı qaýymdastyǵynyń negizin qalaýshy, halyqaralyq klınıkalyq standarttarǵa aınalǵan kóptegen ǵylymı jumystardyń avtory, qaýymdastyqtyń jahandyq prezıdenti, professor Salım Abdýlraýftyń jetekshiligimen ótti. Keleli keńes barysynda mıdyń qıly qatparyndaǵy keselderdi zamanaýı tehnologııanyń ıgiligimen sylyp tastap júrgen aıtýly mamandar tájirıbelerimen bólisti.
Walter E. Dandy qaýymdastyǵy 2011 jyly AQSh-ta zamanaýı neırohırýrgııanyń negizin qalaýshylardyń biri – doktor Ýolter Edvard Dendıdiń qurmetine quryldy. Uıym qurylǵan sátten bastap búkil álemde ozyq tájirıbeni nasıhattaýǵa, ǵylymı bilimmen almasýǵa, neırohırýrgııalyq kómek deńgeıin arttyrýǵa baǵyt ustady.
Is-sharanyń eki kúndik baǵdarlamasynda 40-tan astam ǵylymı baıandamalar, dóńgelek ústelder, pikirtalastar men sheberlik saǵaty uıymdastyryldy. Eń ózekti máseleler talqylanyp, ınnovasııalyq neırohırýrgııalyq tásilder, neırohırýrgııada joǵary tehnologııalardy qoldaný, kúrdeli onkologııalyq patologııalardy emdeý, sondaı-aq fýnksıonaldyq, balalar neırohırýrgııasyndaǵy jańa baǵyttar tóńireginde tyń ıdeıalar aıtyldy.
«Astanada kongress ótkizý – álemdik arenada elimizdiń neırohırýrgııa salasynyń moıyndalýy. Jyl saıyn bizdiń Ortalyqta 5 myńnan astam operasııa jasalady. Ortalyq sonymen qatar ǵylymı qyzmetpen belsendi aınalysady. Qazirgi ýaqytta Ulttyq neırohırýrgııa ortalyǵy ázirlegen ádisti: omyrtqa denelerin aýystyrýǵa arnalǵan derbestendirilgen 3D tehnologııalyq ımplanttaryn kommersııalandyrý jónindegi jumystar qolǵa alyndy. Bul ádistiń praktıkalyq qyzmetke ıntegrasııasy ádistiń engizý aýqymynyń ulǵaıýy men masshtabtaý keleshegine jol ashady. Sondaı-aq ortalyq Azııadaǵy jalǵyz radıohırýrgııalyq keshen – «Gamma-pyshaq» apparaty jumys isteıdi. Búginde onyń kómegimen 2 000-nan astam pasıent emdeldi. Ortalyq Azııa elderinde «Gamma-pyshaq» apparatyn paıdalaný aýqymyn keńeıtý maqsatynda úkimetaralyq kelisim júrgizilip jatyr», dep atap ótti «Ulttyq neırohırýrgııa ortalyǵy» AQ Basqarma tóraǵasy, Ýolter Dendı atyndaǵy neırohırýrgııalyq qaýymdastyǵynyń X Dúnıejúzilik kongresiniń Prezıdenti, professor Serik Aqsholaqov.
Kongreste sóz alǵan Walter E.Dandy neırohırýrgııalyq qaýymdastyǵy Dúnıejúzilik kongresiniń jahandyq prezıdenti Salım Abdýlraýf (AQSh), Premer-mınıstriniń orynbasary Ermek Kósherbaev, Densaýlyq saqtaý mınıstri Aqmaral Álnazarova, Prezıdent janyndaǵy Ulttyq ǵylym akademııasynyń prezıdenti Aqylbek Kúrishbaev, Parlament Májilisi Áleýmettik-mádenı damý komıtetiniń tóraǵasy Ashat Aımaǵambetov otandyq neırohırýrgııa salasyndaǵy jetistikterge toqtaldy.
Kongreste álemniń jetekshi sarapshylarynyń 40-tan astam baıandamasy tyńdalyp, plenarlyq sessııalar men sheber-klastarynda jańa ázirlemeler talqylandy. Kongress otandyq neırohırýrgııanyń áleýetin tanytyp, ǵylymı, klınıkalyq yntymaqtastyqty nyǵaıtýǵa serpin beredi. Taǵy bir maqsat – medısınada ınnovasııalyq tásilderdiń engizilýin jedeldetip, otandyq mamandardyń biliktiligin arttyrý, elimizdi Ortalyq Azııanyń medısınalyq haby retinde ilgeriletý.
«Ulttyq neırohırýrgııa ortalyǵy» AQ – neırohırýrgııalyq patologııa kezinde dıagnostıkadan bastap, pasıentterdi erte ońaltýǵa deıingi medısınalyq qyzmetterdiń tolyq spektrin kórsetetin elimizdegi joǵary mamandandyrylǵan klınıka. Ortalyq Gamma-pyshaq, neıronavıgasııalyq, robottyq júıeler, rezıdentterdi daıarlaýǵa arnalǵan joǵary dáldiktegi sımýlıasııalyq trenajerlerdi qosa alǵanda, ozyq tehnologııalarmen jabdyqtalǵan. Qurylǵan sátinen bastap joǵary tehnologııalyq neırohırýrgııany engizýdiń draıveri sanalady, halyqaralyq jobalarǵa belsendi qatysady ári jetekshi sheteldik klınıkalarmen yntymaqtastyq ornatqan. 17 jyl ishinde ortalyqta 70 myńnan astam pasıent emdeldi. Jyl saıyn júıke júıesiniń eń kúrdeli patologııasy bar pasıentterge 5 000-ǵa jýyq operasııa jasalady. Elimizde alǵash ret neırohırýrgııanyń túbegeıli jańa bólimderi – mıkroneırohırýrgııa, endovaskýlıarlyq, endoskopııalyq, fýnksıonaldyq neırohırýrgııa engizildi. 80 jańa medısınalyq tehnologııanyń arqasynda elimizde joǵary tehnologııalyq emdeý qoljetimdi. Ortalyq ashylǵanǵa deıin joǵary tehnologııalyq medısınalyq kómekke muqtaj pasıentterdiń 80%-da el ishinde mundaı em alý múmkindigi bolmaǵan.
