Almatyda ekolog Mels Eleýsizovtiń úıi órtenip ketti

ASTANA. 7 mamyr. Almatyda «Tabıǵat» ekologııalyq odaǵynyń tóraǵasy Mels Eleýsizovtiń úıi órtenip ketti. Otqa oranǵan úı atalǵan odaqtyń keńsesi retinde de paıdalanylyp kelgen. Bul týraly KTK telearnasy habarlady. Qazirgi tańda keńseleriniń kúli kókke ushqan ekologııalyq odaqtyń qyzmetkerleri jumyssyz qaldy. О́rttiń shyǵý sebepteri týraly birneshe nusqa aıtylýda. Ázirge naqty sebebi belgisiz. Kópshiliktiń paıymdaýynsha, tilsiz jaý elektr symdarynyń tuıyqtalýynan paıda bolýy múmkin. «Biz Balqash kólinde uıymdastyrylǵan jelkendi qaıyqtar jarysynan túndeletip oraldyq. Kelsek, keńsemiz órtenip jatyr. Bul jerde bazamyzdyń dırektory turatyn. Alaıda, ol bul kezde úıde bolmaǵan. Aýrýhanada jatyr», – deıdi Mels Eleýsizov. О́rt kezinde úıde baza dırektorynyń áıeli men balalary bolǵan. Tún ortasynda kelinshek tútinniń ıisi men satyrlaǵan daýystan oıanyp ketip, ajal aýzynan aman qalǵan. Áıel balalaryn dalaǵa shyǵaryp, qujattaryn ǵana alyp úlgergen eken. Qazirgi tańda zardap shegýshiler ýaqytsha týǵan-týystaryn panalaýda. Kómekke «Tabıǵat» odaǵynyń músheleri kelip, kıim-keshek pen aqshalaı qoldaý kórsetti. О́rt saldarynan shatyry ortasyna túsken úıden qańqasy men irgetasy ǵana qalǵan. Úıdiń 70 jyl buryn salynǵan. Bul jóninde Eleýsizov myrza: «О́te eski qurylys. Keńes zamanynda salynǵan. Qańqasy qamystan jasalǵan. Sol sebepti de laýlap, tez órtenip ketti», – deıdi. Keıbireýler úıdiń ádeıi órtelýi múmkin ekenin de joqqa shyǵarǵan joq. Oǵan Mels Eleýsizovtiń sońǵy kezderdegi belsendiligi sebep bolýy múmkin. Bul rette ekologqa qarsy jasalǵan ótken jylǵy qastańdyq áreketi nazarǵa alyndy. Aıta keteıik, 2014 jyly buzaqylar Eleýsizovtiń Almatydaǵy qoqystardy sorttaıtyn keshenin qıratyp ketken bolatyn. Elaman Qońyr. Derek sýret: KTK telearnasy.