Foto: pixabay.com
Vedomstvonyń málimetinshe, tek elorda áýejaıynda júrgizilgen jedel-izdestirý sharalarynyń nátıjesinde bıylǵy alty aı ishinde 34 myńnan astam áýe reısi men 4,3 mıllıonnan astam jolaýshy tekserilgen. Osy jumystar barysynda 100-den astam tyıym salynǵan zattar men buıymdardy zańsyz alyp ótý áreketteri áshkerelenip, 53 qylmys pen 1348-den astam ákimshilik quqyqbuzýshylyq tirkelgen. Sonymen qatar, 43 birlik atys jáne sýyq qarý tárkilengen.
Kóliktegi polısııa departamenti Ishki ister mınıstrligimen birlesip, áýe jáne temirjol kólikterindegi qoǵamdyq tártip pen jolaýshylar qaýipsizdigin qamtamasyz etý, qoǵamda «Zań men tártip» qaǵıdatyn nyǵaıtý baǵytynda júıeli jumys júrgizip jatyr.
Departament bastyǵynyń birinshi orynbasary Madııar Aıtýǵanovtyń aıtýynsha, 2025 jyldyń basynan beri kóliktegi polısııa qyzmetkerleri 20 mıllıonǵa jýyq jolaýshynyń qaýipsizdigin qamtamasyz etken. Onyń ishinde 11 mıllıonnan astamy temirjolmen, 8,9 mıllıonnan astamy áýe kóligimen qatynaǵandar.
Máselen, Astana qalasynyń halyqaralyq áýejaıy arqyly alty aı ishinde 4,3 mıllıonnan astam jolaýshy qatynaǵan. Onyń 2 997 981-i ishki, 1 376 954-i halyqaralyq baǵyttaǵy reıster jolaýshylary.
«Kólik nysandaryn zańsyz aralasý áreketterinen qorǵaý – árdaıym ózekti másele. Sondyqtan quqyq qorǵaý qyzmetkerleri quqyqbuzýshylyqtyń aldyn alý men azamattardyń qaýipsizdigin qamtamasyz etýge erekshe kóńil bólip otyr», dedi Aıtýǵanov.
Osy maqsatta departament pen onyń aımaqtyq bólimsheleri «Quqyqtyq tártip», «Kóliktegi qaýipsizdik», «Mıgrant», «Qara sora» sekildi profılaktıkalyq is-sharalardy turaqty túrde ótkizip keledi. Bul naýqandar qylmystyń aldyn alýǵa, sondaı-aq kólik salasyndaǵy tártip pen halyqtyń quqyqtyq mádenıetin arttyrýǵa baǵyttalǵan.
«Bizdiń basty maqsatymyz – ár azamatqa, sonyń ishinde jolaýshylar men kólik ınfraqurylymy qyzmetkerlerine ózin qaýipsiz ári jaıly sezinetin orta qalyptastyrý. Quqyqbuzýshylyqtarǵa qarsy senimdi júıe qurý – bizdiń basymdyq», dep atap ótti Aıtýǵanov.
Aıta keterligi, búginde departament jumysyna zamanaýı sıfrlyq sheshimder belsendi engizilip, qoǵamdyq tártipti qamtamasyz etý men qylmystyń izin sýytpaı ashýda qyzmettik-izdestirý ıtteri de keńinen qoldanylyp keledi.
«Biz árdaıym jedel jaǵdaıdy taldap, tártip saqshylaryn qylmys qaýpi joǵary aımaqtarǵa jiberemiz. Turaqty túrde reıdter ótkiziledi. Jyl basynan beri 48 myńǵa jýyq azamat ákimshilik jaýapkershilikke tartyldy. Kóliktegi polısııa departamenti quqyq buzýshylyqtyń aldyn alý, azamattardyń konstıtýsııalyq quqyqtary men bostandyqtaryn qorǵaý, sondaı-aq kólik ınfraqurylymy nysandarynda qaýipsiz orta qalyptastyrý maqsatyndaǵy aldyn alý sharalaryn keshendi túrde jalǵastyryp jatyr», dedi departament bastyǵynyń birinshi orynbasary.
Eske sala keteıik, 2025 jyl – Ishki ister mınıstrligi tarapynan «Quqyqbuzýshylyqtyń aldyn alý jyly» dep jarııalanǵan. Negizgi maqsat – qylmys pen quqyqbuzýshylyqtardyń aldyn alyp, oǵan jol ashatyn sebepter men jaǵdaılardy joıý. Polısııa «Zań men tártiptiń» berik qorǵany bolýǵa umtylyp keledi.
