Kompanııanyń aıtýynsha, kıbershabýyldarǵa Qytaı memleketi qoldaıtyn Linen Typhoon men Violet Typhoon toptary jáne Qytaı aýmaǵynan áreket etetin Storm-2603 atty hakerlik top qatysqan. Olar SharePoint júıelerindegi osal tustardy paıdalanyp, júıege zańsyz qol jetkizgen.
Microsoft qaýipsizdik jańartýlaryn shyǵardy jáne barlyq jergilikti SharePoint serverlerin paıdalanýshylarǵa bul jańartýlardy dereý ornatýdy usyndy. Kompanııa bul osaldyqtar túzelmegen júıelerge shabýyl jalǵasýy múmkin ekenin «joǵary senimmen» boljap otyr.
«Hakerler serverge arnaıy suranys jiberip, krıptografııalyq kiltterdi urlaýǵa múmkindik alǵan», delingen Microsoft taratqan málimdemede.
Alaıda, bul aıyptaýlarǵa baılanysty Qytaı tarapy jaýap berip úlgerdi. AQSh-taǵy Qytaı elshiliginiń ókili Lıý Penıýı X jelisindegi málimdemesinde:
«Qytaı kıbershabýyldar men kıberqylmystyń kez kelgen túrine úzildi-kesildi qarsy jáne olarmen kúresedi. Sonymen qatar, naqty dálelsiz ózgelerdi qaralaýǵa úzildi-kesildi qarsymyz», dep jazdy.
Microsoft shabýyldarǵa qatysqan ózge de hakerlik toptardy anyqtaý boıynsha tergeýdi jalǵastyryp jatqanyn aıtyp, resmı blogynda qosymsha málimetter jarııalap otyratynyn habarlady.
