Memlekettik aýdıt tekserý jáne jazalaý emes, eń aldymen aldyn alý ekenin eskersek, profılaktıkalyq baqylaý men bıýdjet monıtorınginiń tolyq sıfrlanýy – ýaqyt talaby. Jańa rásimder memlekettik organdar men olardyń baǵynyshty mekemeleri arasyndaǵy ózara baılanysqa serpin berip, jumys úderisterin jedeldetedi. Bul óz kezeginde bıýdjet qarjysynyń ashyq ári maqsatty jumsalýyn qamtamasyz etedi.
Sıfrly kabınet pen «aqyldy» qalqan
Ishki aýdıt júıesin keshendi sıfrlandyrý aıasynda qos birdeı mańyzdy joba qolǵa alyndy. Onyń biri – «Aýdıtordyń biryńǵaı kabıneti». Bul joba IMAK pen onyń óńirlik departamentteri úshin biryńǵaı sıfrly basqarý ortalyǵyna aınalyp otyr. Barlyq bıznes-prosester men aqparat júıeleri bir tereze qaǵıdasy boıynsha ıntegrasııalanyp, jumystyń tıimdiligi men ashyqtyǵyn arttyrady.
Ekinshi bastama – «Aýdıtor qalqany AI». Bul — aýdıtorlardy qashyqtan oqytyp, sertıfıkattaýǵa arnalǵan ıntellektýaldy júıe. Joba memlekettik aýdıt salasyndaǵy kadrlyq áleýetti kúsheıtýdi jáne úzdiksiz biliktilikti qamtamasyz etýdi maqsat etedi.
Atalǵan bastamalardyń barlyǵy Qarjy mınıstri Mádı Takıev bekitken IMAK-tiń sıfrlandyrý jónindegi Jol kartasy aıasynda júzege asyrylyp jatyr. Qujat 30 naqty is-sharany qamtıdy. Onda taldaý áleýetin nyǵaıtý, derektermen jumys sapasyn jaqsartý jáne sıfrly aýdıt quraldaryn damytýǵa basymdyq berilgen.
IMAK tóraǵasynyń orynbasary Murat Orazbaıdyń aıtýynsha, sıfrly jańǵyrý sátti ótýi úshin komıtet «Elektrondyq qarjy ortalyǵy» AQ-men birlesken jumys sessııalaryn ótkizgen.
«Sıfrly transformasııa sátti ótýi úshin komıtet «Elektrondyq qarjy ortalyǵy» AQ-men arnaıy jumys sessııalaryn ótkizdi. Bul Qarjy mınıstrliginiń aqparat júıelerin ázirleýshilermen úılesimdi jumysty jolǵa qoıyp, bizdiń mindetterdi sıfrly ınfraqurylym múmkindikterimen birizdendirýge septigin tıgizdi», dedi ol.
