ASTANA. 17 aqpan. VTB lıgasy aıasyndaǵy kezekti oıynyn máskeýlik SSKA-ǵa qarsy ótkizgen «Astana» 60:78 esebimen ese jiberdi. Bul týraly egemen.kz habarlady.
Elordamyzdaǵy «Saryarqa» velotreginde ótken oıynda esepti alań ıeleri ashty. Degenmen, qonaqtar birden «tizgindi» óz qoldaryna alyp, oıynǵa tolyǵymen baqylaý júrgizdi. Alǵashqy kezeń SSKA-nyń paıdasyna 14:19 esebimen aıaqtaldy.
Ekinshi jáne úshinshi kezeńderde «Astana» áıgili komandaǵa aıtarlyqtaı qarsylyq kórsetti. Sonyń nátıjesinde, ekinshi kezeńde tek eki upaı aıyrmashylyǵymen jeńilse (25:27), kelesi on mınýttyqta 15:14 esebimen basym tústi. Alaıda, jalpy esep máskeýlikterdiń paıdasyna 54:60 bolatyn.
Sheshýshi kezeńde astanalyqtardyń adymyn ashtyrmaǵan qonaqtar 18 upaı oljalady. Al Ramýnas Býtaýtas jattyqtyratyn bizdiń komanda bar-joǵy 6 upaımen jaýap qaıtardy. Tórt kezeń qorytyndysy boıynsha SSKA-nyń paıdasyna 60:78 esebi tirkelip, «Astana» lıga aıasynda jetinshi ret qatarynan jeńilýge májbúr boldy.
Maýsym basynan beri 19 oıyn ótkizgen «Astana» búginde týrnır kestesiniń 14-satysynda keledi. Barlyǵy 16 komanda básekege túsip jatqanyn aıta keteıik. Elordalyqtar VTB lıgasyndaǵy kelesi kezdesýin 22 aqpan kúni óz alańynda estonııalyq «Kalev» komandasyna qarsy ótkizedi.
Elaman Qońyr.
Derek: egemen.kz.
Sýret: bcastana.kz.
