Foto: Qyrmyzy Jumaǵalıqyzy
Mınıstrlik taratylǵan aqparattyń burmalanǵanyn atap ótti. Vedomstvonyń málimdeýinshe, medısınalyq qyzmetter tarıfi bul memleket bekitken soma, ıaǵnı emhanalar men aýrýhanalar sııaqty medısınalyq uıymdarǵa naýqastardy emdegeni úshin tólenetin qarajat. Bul tólemder Medısınalyq saqtandyrý qory arqyly júzege asyrylady.
«Máselen, eger azamat medısınalyq kómekti mindetti áleýmettik medısınalyq saqtandyrý (MÁMS) júıesi arqyly nemese memleket kepildik bergen tegin medısınalyq kómek (TMKKK) aıasynda alsa, ol eshqandaı tólem jasamaıdy. Alaıda bul qyzmet úshin Medısınalyq saqtandyrý qory medısınalyq uıymǵa bekitilgen tarıf boıynsha aqy tóleıdi», delingen habarlamada.
Osyǵan baılanysty mınıstrlik tarıftiń artýy halyq úshin emdelý baǵasynyń ósýin bildirmeıtinin naqtylady.
2025 jylǵy 22 shildede jarııalanǵan Densaýlyq saqtaý mınıstrliginiń baspasóz habarlamasynda («Qoǵamdyq keńeste medısınalyq saqtandyrý júıesindegi negizgi ózgerister talqylandy») 2026 jyldan bastap toǵyz negizgi baǵyt boıynsha tarıfterdi kóterý josparlanyp otyrǵany aıtylǵan. Bul tarıfter 2020 jyldan beri qaıta qaralmaǵan jáne qazirgi kezde medısınalyq qyzmetterdiń naqty ózindik qunyn tolyq jappaıdy.
Habarlamada tarıfterdi ózektendirý stasıonarlyq sektordaǵy sozylmaly qarjylandyrý tapshylyǵyn joıý jáne medısınalyq qyzmetterdiń naqty qunyn óteý maqsatynda júrgizilip jatqany atap ótildi. Sondaı-aq bul sharalar medısınalyq kómektiń sapasy men qoljetimdiligin arttyrý jáne medısına qyzmetkerleriniń eńbegin ádil baǵalaý baǵytynda qolǵa alynǵan júıeli jumystardyń bir bóligi ekeni kórsetilgen.
Mınıstrlik atap ótkendeı, azamattar úshin TMKKK men MÁMS paketterine kiretin barlyq qyzmetter burynǵysha tegin bolyp qala beredi.
