О́SKEMEN. 6 mamyr. О́skemende Uly Jeńistiń 70 jyldyq mereıtoıy qarsańynda birqatar ardagerler baspanaly boldy. Bul týraly egemen.kz tilshisi habarlady.
Uly Otan soǵysynda etigimen qan keship, qar jastanǵan Ivan Popov, Ivan Fedorov, Makar Harın, Mıhaıl Terýnov esimdi qart maıdangerlerge páter kiltin О́skemen qalasynyń ákimi Temirbek Qasymjanov tapsyrdy. Atalǵan páterler shahardyń órkendep kele jatqan kórkem aýdany sanalatyn Ertis ózeniniń sol jaǵalaýynda ornalasqan.
«Elbasymyz Nursultan Nazarbaev Otan úshin ot keshken ardagerlerdi eshqashan umyt qaldyrǵan emes. Memleket basshysynyń tikeleı tapsyrmasymen elimizde ardagerlerge zor qoldaý kórsetilip keledi. Búgingi urpaqtyń sizderge degen alǵysy sheksiz», dedi Temirbek Qasymjanov.
Qala basshysynyń aıtýynsha, qazirgi kezde oblys ortalyǵynda baspana kezeginde turǵan soǵys ardagerleri joq. Sońǵy jyldary barlyq ardagerler baspanamen qamtamasyz etildi.
95 jasqa kelgen Mıhaıl Terýnov Shyǵys Qazaqstan oblysynyń Samar aýylynda dúnıege kelgen eken. Ol 1939 jyly ásker qataryna shaqyrylady. Máskeýde, odan keıin Lenıngrad oblysynyń Vyborg qalasynda áskerı boryshyn ótep júrgeninde soǵys bastalyp, maıdanǵa kirgen jas jaýynger Germanııaǵa deıin jetip, jeńisti Elba qalasynda qarsy alady. Áskerı qyzmetten 1947 jyly bosaıdy. Uzaq jyldar Samar aýylynda turǵan maıdanger osydan úsh jyl buryn О́skemen qalasyna kóship kelipti. Qart maıdanger surapyl jyldarda bastan ótkergen qıyndyqty eske ala otyryp, ardagerlerge zor qoldaý kórsetip otyrǵan Memleket basshysyna aıryqsha alǵysyn jetkizdi.
Dýman Anash.
Derek, sýret: egemen.kz
