Atyraýda balyqshylardy izdegen qutqarýshylar joǵalyp ketti

ASTANA. 19 naýryz. Atyraý oblysynda Kaspıı teńizi aıdynynda joǵalǵan balyqshylardy izdeı shyqqan tórt qutqarýshydan habar bolmaı ketti. Bul týraly «Munaıly astana» gazeti jazady. Naýryzdyń 16-sy kúni Atyraýǵa irgeles eldi mekenniń eki turǵyny motosıklge minip, Kaspııdiń ústinen oıyq arqyly balyq aýlaýǵa barǵan jerlerinde adasyp ketedi. Gazet redaksııasyna habarlanǵandaı, balyqshylar óz joldaryn Atyraý qalasynan 170-180 shaqyrym jerdegi Isataı aýdanynyń Zabýryn aýylynan bastaıdy. «Qatyp jatqan jaǵalaýda adasyp ketip, bir táýlik boıy júrgen olar kelesi kúni, 17 naýryzda kórshiles Qurmanǵazy aýdanynyń balyqshylarymen jolyǵysady. Motosıklderin muz ústine qaldyrǵan olar qaıyqpen Qurmanǵazy aýdanynyń Reseımen aradaǵy shekaraǵa jaqyn jerdegi Safonovka aýylyna deıin jetedi. Sol jaqtan tek 17-si kúni keshke qaraı ǵana qaıtadan Zabýryn aýylyna oralady. Sóıtse, sol kúni aýyldyń 4 jigiti olardy izdep, «Nıva» mashınasymen jolǵa shyǵyp ketipti. Biraq olardyń kóligi dalada óship, turyp qalǵan», - delingen oblystyq tótenshe jaǵdaılar departamentiniń habarlamasynda. Budan ári izdeýshiler JPS navıgatorynyń kómegimen jaıaý júrýge kóshedi. Túndi olar teńizdiń jaǵalaýynda ótkizedi. Al tańerteń navıgator isten shyǵyp qalady. Bul aýyldaǵylardyń olardy joǵaldyǵa sanaýlaryna sebep bolady. Sosyn, 18 naýryz kúni tańerteń olardyń týǵan-týystary polısııaǵa habar berip, shuǵyl izdestirý jumystary bastalady. Osylaısha aýdandyq tótenshe jaǵdaılar bóliminiń bes qyzmetkeri bir kólikpen jáne Zabýryn aýylynyń 57 azamaty 13 motosıklmen, 5 avtomashınamen izdeýge shyǵady. Oblystyq departamentte joǵalǵan adamdardy izdeý jónindegi shtab qurylady. Izdeýshiler tobyna kómekke Atyraýdan segiz qutqarýshy jiberiledi. Kórshi aýdannan taǵy 4 qyzmetker qosylady. Jolda qalǵan «Nıva» shamamen 13:15 saǵatta Zabýrynnan 20 shaqyrym jerde, Kaspıı baǵytynan tabylady. Alaıda, ketip qalǵan adamdary tabyla qoımaıdy. Sosyn Atyraýdan «Evrokopter» markaly tikushaq ushyp keledi. Ol teńiz jaǵalap ushýdyń nátıjesinde joǵalǵandardy jaǵalaýdan 40 shaqyrymdaı qashyqtaǵy «Novınskıe» aralynan tabady. Jıyrma mınýttan keıin olar Zabýrynǵa jetkizildi. Murat Aıtqoja. Derek, sýret: Munaıly astana.