Elektr qýatyn arttyrý maqsatynda Aqshı men Beskól aýyldary arasynda 56,8 shaqyrymdyq joǵary kerneýli jeli men 2 qosalqy stansııa salyndy. Qazir bul nysandardyń abattandyrý jumystary aıaqtalýǵa jaqyn. Sonymen qatar, Aqshı aýylynda 69,7 shaqyrymdyq magıstraldy káriz jelisi tartylyp, endi tazartý qurylǵysynyń qurylysy bastaldy. Kelesi kezeńde Kóktuma aýylynda da káriz júıesin júrgizý josparda.
Kól jaǵalaýyn shaıyp ketý qaýpin azaıtý maqsatynda respýblıkalyq bıýdjetten qarjy bólinip, bóget salý jobasynyń alǵashqy kezeńi qolǵa alyndy. Bul bastama ekologııalyq qaýipsizdikpen qatar, týrızmniń turaqty damýyna jol ashady.
Aımaqta tazalyq pen qyzmet kórsetý sapasy da nazardan tys qalǵan joq. Bıyl jaǵalaýǵa 7 arnaıy tehnıka, 19 modýldik sanıtarlyq torap jáne 140 qoqys jáshigi ornatyldy. Jalpy, búginde 220 turmystyq qaldyq konteıneri men 22 sanıtarlyq-gıgıenalyq torap qyzmet kórsetedi.
Sonymen qatar, sý aıdynyndaǵy qaýipsizdik máselesi de qatań baqylaýda. Ortaq sý paıdalaný erejesine sáıkes, shomylatyn aımaqtar men shaǵyn kemeler joly býılarmen belgilenip, arnaıy ınspektorlar men polısııa qyzmetkerleri jumys júrgizip otyr.
2024 jyly Alakól jaǵasynda demalýshylar sany 1,7 mln adamǵa jetip, kórsetkish 6,2%-ǵa artty. Qyzmet kórsetý kólemi de 1,8 esege ósken. Jaǵalaýdaǵy týrıstik nysandar sany 270-ke jetip, bir jyl ishinde 35,6%-ǵa kóbeıdi.
— Jyl saıyn otbasymyzben Aqshı jaǵalaýyna kelemiz. Tazalyǵy men qyzmet kórsetý sapasy jyldan jylǵa jaqsaryp keledi. Alakóldiń shıpaly sýy – naǵyz tabıǵı baılyq, — deıdi demalýshylardyń biri Álııa Ǵabıdollaqyzy.
Alakól óńirindegi bul oń ózgerister – týrızmdi damytý jolyndaǵy naqty nátıjelerdiń kórinisi.
