Qazaq beıneleý ónerine aıshyqty iz qaldyrǵan dáýletııar daryn ıesi – HH ǵasyrda ult ónerindegi jańa kórkemdik dáýirdiń bastaýynda turǵan, ulttyq beıneleý óneriniń negizin qalaýshylardyń biri. Ol otandyq sýret áleminiń qalyptasýyna jol ashyp, tutas bir býyn sýretshilerge ustaz bola bildi.
Kenbaevtyń shyǵarmashylyǵy tek keskindememen shektelmeıdi. 1960–1980 jyldar aralyǵynda ol elimizde qoǵamdyq ǵımarattarda mozaıka óneriniń damýyna aıryqsha úles qosty. Onyń monýmentaldy shyǵarmalary búgingi kúni Qazaqstannyń sáýlettik kelbetiniń ajyramas bóligine aınalǵan.
Mýzeı ujymy kórmeniń basty maqsaty – ult rýhanııatyna súbeli úles qosqan kórkemóner sheberiniń baı murasyn ulyqtap, keleshek urpaqqa nasıhattaý ekenin aıtady. Ekspozısııada halyq sýretshisiniń 100-ge jýyq tańdaýly týyndysy usynylǵan.
Is-sharaǵa Almaty qalasy ákimdigi, ǵylymı jáne shyǵarmashylyq zııaly qaýym ókilderi, mádenıet pen óner qaıratkerleri, sondaı-aq Moldahmet Kenbaev shyǵarmalaryna qurmetpen qaraıtyn óner janashyrlary qatysty.
Kórmeniń ashylý saltanatynda sóz alǵan QR Memlekettik ortalyq mýzeıi dırektorynyń mindetin atqarýshy Serjan Sarov dańqty sýretshiniń murasy ónertanýshylar úshin óreli qazyna ekenin aıtyp, Mádenıet jáne aqparat mınıstri Aıda Balaevanyń quttyqtaýyn jetkizdi. Sondaı-aq, Kenbaevtyń ulttyq ónerdegi orny men mýzeı qoryndaǵy týyndylarynyń tarıhı mańyzyn erekshe atap ótti.
Saltanatty keshte ónertaný kandıdaty, dosent, «ARK» kórkemóner galereıasynyń negizin qalaýshy ári dırektory, KSRO Sáýletshiler odaǵynyń teorııa jáne syn salasy boıynsha laýreaty Elızaveta Malınovskaıa men Qazaqstan Sýretshiler odaǵy Hatshylyǵynyń múshesi Ásııa Haırýlına, Almaty qalasy Mádenıet basqarmasynyń orynbasary Arman Halbekov sýretshi shyǵarmashylyǵy haqynda jyly lebizderin jetkizdi.
Kesh sońynda sóz kórmeniń uıymdastyrýshysy ári áke ónerin jalǵastyrýshy Alpamys Moldahmetuly Kenbaevqa berildi. Ol jınalǵan qaýymǵa shynaıy alǵysyn bildirip, ákesiniń shyǵarmashylyq joly men rýhanı murasy týraly estelikterimen bólisti.
Kórmeniń resmı ashylýy barysynda M. Kenbaevtyń «Selına» atty týyndysy sýretshiniń otbasy atynan QR Memlekettik ortalyq mýzeı qoryna syıǵa tartyldy. Bul shyǵarma mýzeıdiń keskindeme toptamasyn tolyqtyryp, ulttyq beıneleý óneriniń altyn qoryn baıyta túspek.
Sonymen qatar, Kenbaevtar otbasy Ortalyq mýzeıge M.Kenbaevtyń ulttyq beıneleý óneri salasyndaǵy jetistikterin dáleldeıtin dıplomdaryn, marapattary men sertıfıkattaryn syıǵa tartty. Bul zattar sheberdiń jeke mýzeılik keshenin qalyptastyryp, Kenbaevtyń kórkem murasyn saqtaý, qorǵaý jáne nasıhattaý jumystaryna da zor septigin tıgizetini anyq.
