Foto: QR Sıfrlyq damý, ınnovasııalar jáne aeroǵarysh ónerkásibi mınıstrligi
Bul joba Growth Vision Pro kompanııasynyń bastamasymen iske qosylyp, Qazaqstan Respýblıkasynyń Sıfrlyq damý, ınnovasııalar jáne aeroǵarysh ónerkásibi mınıstrliginiń, sondaı-aq óńirlik tehnoparkter Astana Hub (Qazaqstan) pen IT Park Uzbekistan-nyń qoldaýymen júzege asqan.
Khan Tengri Innovation Hub — jańa býyndaǵy tehnologııalyq dıplomatııany júzege asyrýǵa baǵyttalǵan arnaıy platforma. Ol Eýrazııa óńirindegi startaptar men joǵary tehnologııalar salasyndaǵy kompanııalardy Qytaı naryǵymen jáne onyń halyqaralyq múmkindikterimen tikeleı baılanystyrýdy kózdeıdi. Bul bastama aımaqaralyq turaqty tehnologııalyq seriktestikke degen artyp kele jatqan suranystyń naqty kórinisi bolyp otyr.
QR Sıfrlyq damý mınıstri Jaslan Mádıev atap ótkendeı, bul hab óńirlik startaptar men kásipkerler úshin Qytaı ınvestorlaryna jol ashyp, ınkýbasııalyq jáne akselerasııalyq baǵdarlamalar arqyly bıznesti damytýǵa septigin tıgizedi.
«Khan-Tengri Innovation Hub óńirdegi startaptar men kásipkerler úshin qytaılyq ınvestorlarmen baılanystyratyn kópirge aınalyp, ınkýbasııalyq jáne akselerasııalyq baǵdarlamalarǵa jol ashady. Biz bul hab elimizdiń tehnologııalyq kompanııalary ónimderin Qytaı naryǵyna ilgeriletýde mańyzdy ról atqarady dep senemiz», dedi Jaslan Madıev.
Jobanyń negizgi mindetteri:
- Sıfrlyq tehnologııalar, ǵylym jáne zertteý salalarynda halyqaralyq tehnologııa transferin damytý;
- Ortalyq Azııadaǵy IT-kompanııalar men startaptardyń Qytaı naryǵyna shyǵýyn qamtamasyz etý;
- Qytaılyq tehnologııalyq bıznestiń Eýrazııa, Eýropa men MENA elderine «Orta dáliz» arqyly jeńildetilgen enýine jaǵdaı jasaý;
- Birlesken ǵylymı-zertteý jobalaryn iske asyrý, tehnologııa almasý men venchýrlik kapıtal tartý;
- Qytaıda Ortalyq Eýrazııa elderiniń ınnovasııalyq bedelin arttyrý.
Aıta keteıik, bul bastama jergilikti naryqtyń erekshelikterine beıimdelý úderisin jeńildetýge, «jumsaq qoný» (soft-landing) qaǵıdaty boıynsha ıkemdi ótýge múmkindik beredi.
Habtyń aýmaǵynda jumys isteý úshin barlyq qajetti ınfraqurylym qarastyrylǵan: zamanaýı keńseler, kovorkıngter, jaıly apartamentter jáne turmystyq-tehnıkalyq qoldaý. Bul kompanııalarǵa ákimshilik qıyndyqtarǵa alańdamaı, óz ónimderin damytýǵa tolyq kóńil bólýge jaǵdaı jasaıdy.
Sonymen qatar, qatysýshylarǵa zańdyq jáne salyqtyq keńes berý, ınvestorlar men óndiristik áriptestermen baılanys ornatý, akselerasııalyq qoldaý, mentorıng jáne iskerlik kezdesýler uıymdastyrý sııaqty keshendi kómek kórsetiledi.
Mınıstrliktiń habarlaýynsha, habtyń aıasynda qytaılyq XNode akseleratorymen birlesip, túrli damý satysyndaǵy kompanııalarǵa arnalǵan birneshe baǵdarlama ázirlengen. Atap aıtqanda:
- China Market Entry Bootcamp – Qytaı naryǵyn zertteýge jáne shyǵý strategııasyn jasaýǵa baǵyttalǵan qysqa merzimdi baǵdarlama;
- China Launchpad – kompanııanyń Qytaıdaǵy jumysyna naqty jol ashyp, naryqtaǵy aýqymyn keńeıtýge múmkindik beretin tolyqqandy baǵdarlama.
Baǵdarlamalar aıasynda startaptar mentorlyq qoldaý alyp, oqytý semınarlaryna qatysyp, Qytaıdyń tehnologııalyq ekojúıesimen tikeleı tanysa alady.
