Sıfrlyq sheshim qazirgi ýaqytta Qyzylorda, Qostanaı jáne Túrkistan oblystarynda pılottyq rejımde synaqtan ótip jatyr. Qosymshany 7 myńnan astam tutynýshy júktep úlgergen. Alǵash bolyp bul qyzmetti Túrkistan oblysynyń turǵyndary paıdalana bastady.
Mobıldi qosymshanyń jumys isteý qaǵıdasy qarapaıym: tutynýshy gaz eseptegishtiń fotosýretin túsirip, júıege júkteıdi. Jasandy ıntellekt tehnologııasy sandardy avtomatty túrde tanıdy jáne óńdeıdi. Bul óz kezeginde eseptegishterdi tirkeý barysyn jedeldetip, adamı faktordan týyndaıtyn qatelikterdi azaıtady, sondaı-aq baqylaýshy mamandardyń úıge kelý qajettiligin joıady.
Kompanııa málimetinshe, jańa júıe operatorlarǵa túsetin júktemeni azaıtyp, esep aıyrysý prosesiniń ashyqtyǵyn qamtamasyz etýge múmkindik beredi. Sonymen qatar, gazdy únemdep tutyný mádenıetin qalyptastyrýǵa yqpal etedi.
Jaqyn arada qosymshanyń fýnksıonaly keńeıtiledi. Tutynýshylarǵa tólem tarıhyn kórý, eseptegishti tekserý merzimderi týraly eskertýler alý jáne gaz jelilerinde júrgiziletin josparly jóndeý jumystary jóninde habarlamalar jiberý múmkindigi qarastyrylyp otyr.
Budan bólek, vırtýaldy kómekshi qyzmeti engizilip, adal tutynýshylarǵa arnalǵan bonýstyq jáne keshbek júıesi iske qosylady dep josparlanyp otyr.
Aıta keteıik, buǵan deıin Densaýlyq saqtaý mınıstrligi dıagnoz qoıý dáldigi 80%-ǵa jetetin jasandy ıntellektke negizdelgen terapevt servısin synaqtan ótkizip jatqanyn málimdegen bolatyn.
