«Qoǵam úni: eńbek adamy jáne aımaqtyq damý» atty jıynda óńirdegi qoǵamdyq uıymdardyń jetistikteri qorytyndylanyp, alda turǵan ózekti máselelerdi sheshý joly talqylanǵan edi. Ásirese azamattyq sektordyń aımaq damýyndaǵy róli, memlekettik qurylymdarmen tıimdi seriktestik ornatý joldary men áleýmettik jobalardy júzege asyrý tájirıbesine kóńil bólindi.
Memleket basshysy Qasym-Jomart Toqaev Ulttyq quryltaıda sóılegen sózinde: «Azamattyq sektor reformalardy júrgizý jáne qoǵamdy damytý isinde mańyzdy ról atqarady. Memleket pen úkimettik emes uıymdardyń seriktestigi ózekti máselelerdi sheshýge, jasampaz qundylyqtardy dáripteýge jáne ulttyń jańa sapasyn qalyptastyrýǵa yqpal etedi», degen edi. Osy baǵyt forýmda kóterilgen máselelermen tolyq úndesip jatty.
Forýmǵa Qazaqstan Azamattyq alıansynyń prezıdenti Baný Nurǵazıeva arnaıy kelip, azamattyq qoǵamdy damytýdyń tujyrymdamasyn jasaqtaý jáne ÚEU týraly zańnamany jetildirý týraly sóz sóıledi.
– Bul jumysty biz 3 jyl buryn bastap edik. Joba daıyndap usyndyq. Bıyl Ulttyq quryltaı múshesi retinde men ózim osy máseleni kóterdim. О́ıtkeni bizge qazir úkimettik emes uıymdardyń jumysyn jańasha retteıtin zań aýadaı qajet. Erekshe rıza bolǵanym – Qasym-Jomart Kemeluly bul bastamany qoldady, qazir úlken jumys júrip jatyr. Sondaı-aq memlekettik tapsyrysty da retteıtin ereje kerek. О́ıtkeni bul granttar negizinen ÚEU-ǵa arnalǵan qarajat bolatyn, biraq qazir ár jaqqa ketip jatyr. Bul durys emes, – deıdi Baný Ǵanıqyzy.
Batys Qazaqstan oblysynda búginde 678 úkimettik emes uıym resmı tirkelgen. Olardyń shamamen 100 shaqtysy belsendi qyzmet etedi. Oblys aýmaǵynda sondaı-aq 7 saıası partııanyń fılıaly, 54 etnomádenı birlestik jáne 14 qoǵamdyq keńes bar. О́ńirdegi Azamattyq resýrstyq ortalyq úkimettik emes uıymdarǵa qajetti keńes berip, ádistemelik kómek kórsetip keledi. Keıingi eki jylda ortalyqta 350-den asa keńes ótkizilgen eken. Bıyl óńirlik uıymdarǵa tájirıbe almasý maqsatyndaǵy «stadı-týrlar» uıymdastyrý josparlanǵan. Keıingi jyldary memlekettik áleýmettik tapsyrys kólemi de aıtarlyqtaı artypty. Bıyl máselen áleýmettik jobalardy iske asyrýǵa 160 joba engizilgen. Bul baǵytta 4 basqarma, Oral qalasy jáne 12 aýdan ákimdigi belsendi qyzmet istep otyr.
Árıne, jıynda osy saladaǵy keıbir olqylyqtar da aıtyldy. Máselen, «Ǵylymı zertteýlerdi qoldaý qorynyń» atqarýshy dırektory Aıbolat Qurymbaevtyń aıtýynsha, tarıhı-ólketaný jáne týrızm baǵytynda qyzmet etetin qoǵamdyq uıymdardy memlekettik qoldaý óte tómen. Bul saladaǵy uıymdar ázirge tek óz kúshine súıenip kún kórip júr. Sondyqtan bolashaqta zańnamalyq qujattarǵa ózgerister engizilse, eldegi, óńirdegi týrızm salasyn damytýǵa tyń serpin keler edi deıdi Aıbolat Shamuratuly.
Osy jyldyń ataýyna oraı Azamattyq forýmda jumysshy mamandyqtyń mártebesin kóterý jóninde de biraz usynys aıtyldy. Sonyń biri – jumysshylardy joǵary memlekettik nagradalarǵa usyný, yntalandyrý, olardy qoǵamdyq, azamattyq mańyzy zor is-sharalarǵa olardy kóptep tartý. Jáne eń mańyzdysy – jumys ornynda olarǵa qolaıly jaǵdaı jasaý.
Osy tusta Batys Qazaqstan mashına jasaý kompanııasynyń bóliser jaqsy tájirıbesi bar eken. Olar jumysshylardy jataqhanamen qamtamasyz etedi, sonymen qatar mekeme óz esebinen jumysshylardy jas ereksheligine qaramaı túrli mamandyqqa oqytyp, jumyspen de qamtıdy. Al «Oral taza servıs» mekemesinde keńse qyzmetkeri qaramaǵyndaǵy jumysshydan kóp jalaqy almaıdy. Iаǵnı tabys kóziniń ádildiligi saqtalady.
– Forýmda Oraldaǵy kolledj dırektorlary memlekettik grant arqyly bilim alǵan mamandy joldama arqyly jumysqa jiberip, qyzmet etýdi mindetteý qajet degen usynys aıtty. О́ıtkeni memleket esebinen bilim alǵan jastar ol mamandyǵyn tastap, kóp jaǵdaıda basqa qyzmetke ketedi eken. Mektep bitirýshiler arasynda da qabiletine, suranysqa mán bermesten joǵary bilimge umtylatyndar kóp. Keıin olardyń kóbi qyzmet taba almaı qınalyp qalady. Al kolledjde oqyp, jaqsy kásip ıgerip, qomaqty tabys jasaýǵa bolatynyn eskere bermeıdi. Jalpy, bul forým ózim úshin óte paıdaly, jaqsy kezdesý boldy. О́z tarapymnan zańǵa ózgeris pen tolyqtyrýlar boıynsha tıisti oryndarǵa depýtattyq saýal joldaımyn dep otyrmyn, – deıdi kásipker, Oral qalalyq máslıhatynyń depýtaty Nurgúl Ashyqova.
Batys Qazaqstan oblysy
