Jınaqtardyń negizgi bóligin – 22,85 trln teńgeni mindetti zeınetaqy jarnalary (MZJ) quraıdy. Bul baǵyttaǵy ósim bir jylda 18,7 paıyzǵa jetken. Al mindetti kásiptik jarnalar (MKZJ) 683,1 mlrd teńgeni qurap, 10,2 paıyzǵa artqan. Eń joǵarǵy ósim erikti jarnalar (EZJ) boıynsha tirkelip otyr – bir jylda 35 paıyzǵa ósip, 8,73 mlrd teńgege jetti.
2024 jyldyń qańtarynan bastap jumys berýshilerdiń mindetti zeınetaqy jarnalary (MZJR) túsip jatyr. 2025 jylǵy 1 shildedegi jaǵdaı boıynsha bul jarnalar kólemi 463,98 mlrd teńgeni quraǵan.
Jalpy alǵanda, 2025 jyldyń alǵashqy jartyjyldyǵynda salymshylardyń shottaryna 1,575 trln teńge túsken. Bul kórsetkish 2024 jyldyń osy kezeńimen salystyrǵanda 19,8 paıyzǵa joǵary.
Investısııalyq tabys ta oń nátıje kórsetip otyr – jyldyń basynan beri taza kiris kólemi 350,7 mlrd teńgege jetken. Sonymen qatar, jyl basynan beri BJZQ-dan tólengen qarajat kólemi 782,87 mlrd teńgeni qurady. Bul ótken jylǵy sáıkes kezeńmen salystyrǵanda 71,1 paıyzǵa artyq. Onyń ishinde 451,58 mlrd teńge turǵyn úı jaǵdaıyn jaqsartý men emdelýge baǵyttalǵan.
Sarapshylar pikirinshe, zeınetaqy salymdarynyń turaqty ósýi azamattardyń eńbek naryǵyna belsendi qatysýymen, jumys berýshilerdiń mindettemelerin oryndaýymen jáne ınvestısııalyq kiristiń oń serpinimen baılanysty. Erikti jarnalar ósimi de qazaqstandyqtardyń zeınet jasyna daıyndyq mádenıeti qalyptasa bastaǵanyn baıqatady.