Bul baǵytta júzege asyrylyp jatqan basty jobalardyń biri – «Saryarqa» magıstraldyq gaz qubyry. Qazirgi tańda onyń ekinshi, úshinshi jáne tórtinshi kezeńderin salý josparlanyp otyr. Gazdy turaqty jetkizýdi qamtamasyz etý úshin «Beıneý – Bozoı – Shymkent» magıstraldyq qubyrynyń ekinshi jelisin tartý kózdelgen. Jańa jeliniń qýaty – jylyna 15 mıllıard tekshe metr. Al alǵashqy kezeń aıasynda úsh birdeı kompressorlyq stansamen jabdyqtalatyn, 1 450 shaqyrymǵa sozylatyn gaz qubyry salynyp jatyr. Bul qurylys 2026 jyly aıaqtalady dep kútiledi.
Úkimet buǵan qosa, shekaralas eldermen kelissózder júrgizip, syrttan gaz ımporttaý máselesin de nazarda ustap otyr. Bul – ásirese Soltústik jáne Shyǵys Qazaqstan oblystary úshin mańyzdy qadam.
Alaıda, gaz salasyn damytý tek ınfraqurylymmen shektelmeıdi. Oljas Bektenovtiń aıtýynsha, bul salaǵa ınvestısııa tartý úshin baǵa saıasaty da teńgerimdi bolýy qajet.
«Bizdiń ishki naryqtaǵy gaz baǵasy álemdik naryqtan áldeqaıda arzan, sondyqtan biz birqalypty, burmalanbaǵan jaǵdaı týǵyzý maqsatynda baǵany birtindep kóterilýin qadaǵalaıtyn bolamyz. Sonda gaz salasy ınvestısııalyq tartymdy bolyp, damıtyn bolady», dedi Úkimet basshysy.
Jalpy, elimizdiń gazdandyrý saıasaty – ekonomıkalyq tıimdilik pen áleýmettik mańyzdylyqty qatar ustanǵan aýqymdy baǵdarlama. Aldaǵy jyldary onyń naqty nátıjesin kórýimiz bek múmkin.
