Foto: Ashyq derekkóz
«Biz Irannyń ıadrolyq múmkindikterin joıǵanbyz. Olar qaıtadan iske qosa alady, biraq eger ondaı áreketke barsa, biz olardyń nysandaryn saýsaǵyn kóterip úlgermeı jatyp joıamyz», dedi Tramp.
Osy málimdemege jaýap retinde Iran syrtqy ister mınıstri Abbas Aragchı 21 shildede Fox News arnasyna bergen suhbatynda Tegeran ýran baıytýdan bas tartpaıtynyn aıtqan.
«Biz bul jumysty ýaqytsha toqtattyq, sebebi shyǵyn kóp boldy. Biraq bul bizdiń ǵalymdarymyzdyń jetistigi ári ulttyq maqtanyshymyz. Sondyqtan ony toqtatý múmkin emes», dedi ol. Sondaı-aq bolashaqtaǵy kez kelgen ıadrolyq kelisimde Irannyń ýran baıytý quqyǵy saqtalýy kerek ekenin jetkizdi.
28 shildede Irannyń syrtqy ister mınıstri áleýmettik jelide (X, burynǵy Twitter) taǵy bir málimdeme jasap, eger Iranǵa qarsy shabýyldar qaıtalansa, jaýap qatań ári naqty bolatynyn eskertken.
«Biz buǵan deıin de ýran baıytýdy jalǵastyryp keldik jáne muny toqtatpaımyz. Bizdiń ıadrolyq baǵdarlamamyz qanmen, mańdaı termen, kóz jasymen qurylǵan. Bul tehnologııa men bilimniń jemisi. Muny eshqandaı bomba joıa almaıdy», dep jazdy mınıstr.
Aıta keteıik, 22 maýsymǵa qaraǵan túni AQSh áskerı kúshteri Irannyń úsh ıadrolyq nysanyna Fordo, Natanz jáne Isfahan qalalaryndaǵy obektilerge áýe soqqy jasaǵan. Tramp bul shabýyldar kezinde Irannyń negizgi ıadrolyq ınfraqurylymy joıylǵanyn málimdegen bolatyn. Alaıda Iran bıligi nysandarda aýyr zaqym bolǵanymen, orny tolmas shyǵyn joq ekenin habarlaǵan.
