Ákimshilik málimetinshe, qazirgi tańda 300 kásipker kómekke júgingen. Olardyń qatarynda 262 stasıonarlyq saýda ornyn jalǵa alǵandar bar. Odan bólek bankomat, massaj kreslosy, termınal, shaǵyn saýda núkteleri sııaqty mıkrobıznes ókilderi qosylady. Shyǵyn kólemin anyqtaý jumystary áli de jalǵasyp jatyr.
Bazar basshylyǵy alǵashqy kúnnen bastap oqıǵa ornynda bolyp, jalǵa alýshylarmen tikeleı jumys istep jatqanyn atap ótti. Basty maqsat kásipkerlerge jumysyn jalǵastyrýǵa múmkindik berý.
Qazirgi tańda azyq-túlik ónimderin satýmen aınalysqan jáne et pavılonynda jumys istegen kásipkerlerdiń 100 paıyzy kórshiles ornalasqan "Ordabazar" aýmaǵyndaǵy saýda oryndaryna ornalastyryldy, - dedi ákimshilik.
Iri kásipkerler bos turǵan ǵımarattarǵa nemese burynǵy jumys istep turǵan núktelerdi qysqartý arqyly ornalastyrylǵan. Sonymen qatar, "Ordabazar" aýmaǵyna 142 saýda konteıneri ornatylyp, jalpy 7000 sharshy metrge jýyq saýda alańy berilgen.
Ákimshilik zardap shekken kásipkerlerge saýda oryndary bir jylǵa deıin tegin beriletinin málimdedi.
Saýda alańdary bir jyl merzimge aqysyz usynylady. Al salyqtyq jeńildikterge qatysty sheshimder memlekettik deńgeıde qabyldanady. Bul bizdiń quzyretimizge kirmeıdi, - dedi bazar ákimshiligi.
Budan bólek, "Bıg Shanhaı" ákimshiligi saýda nysanyn tolyq jańǵyrtýdy osy jyldyń sońyna deıin aıaqtaýdy josparlap otyr.
Qazirgi ýaqytta kásipkerler ýaqytsha "Ordabazarda" jáne arnaıy ornatylǵan konteınerlerde jumysyn jalǵastyrýda. Alash tas joly, 32 mekenjaıyndaǵy "Shanhaı" saýda orny "Naryqtardy jańǵyrtý" baǵdarlamasy aıasynda qaıta jóndeýden ótýde, - dep habarlady basshylyq.
