Taldyqorǵanda soǵys ardagerlerine páter berildi

TALDYQORǴAN. 19 naýryz. Búgin Almaty oblysynyń ákimi Amandyq Batalov Uly Otan soǵysy Jeńisiniń 70 jyldyǵy qarsańynda Taldyqorǵan qalasynda turatyn erligimen eline sheksiz baqyt syılaǵan soǵys ardagerlerine 52 páterdiń kiltin tabys etti. Bul týraly egemen.kz tilshisi Nurbol Áldibaev habarlady. Saltanatty sharada óńir basshysy ardagerler men tyl eńbekkerlerin Naýryz meıramymen quttyqtap, óziniń merekelik tilegin jetkizdi: «Búgingi kúni Almaty oblysynda turyp jatqan Uly Otan soǵysynyń 355 ardagerlerine jan-jaqty qoldaý jumystary kórsetilýde. Naýryz merekesine oraı, búgin Sizderge oblys ortalyǵy Taldyqorǵan qalasynan 52 páterdiń kiltin tapsyrǵaly otyrmyz. Osyndaı baspanamen oblysymyzdyń barlyq aýdandary men qalalaryndaǵy soǵys ardagerleri de qamtylatyn bolady. Biz sizderdi árqashan maqtan tutamyz, qurmetteımiz. Sizder tarıhtyń altyn qazynasysyzdar. Naýryz merekesi qarsańynda barlyqtaryńyzǵa zor densaýlyq, uzaq ǵumyr, baıandy baqyt, al otbasylaryńyz ben týǵan-týystaryńyzǵa amandyq pen ıgilik tileımin. Jańa baspanalaryńyz jaıly bolyp, shańyraqtaryńyz shattyqqa tolsyn qurmetti ardagerler», dedi oblys ákimi. Merekelik quttyqtaýdan soń Amandyq Batalov ardagerlerdiń barlyǵyna jeke-jeke páterdiń kiltin tabystady. Sharaǵa jınalǵan ardagerler qaýymy Elbasy tarapynan jasalyp jatqan osyndaı ıgi sharalarǵa, jan-jaqty qoldaý jumystaryna óz rızashylyqtaryn bildirip, alǵystaryn jetkizdi. Nurbol Áldibaev. Derek: egemen.kz. Sýret: zhetysu.gov.kz.