QOSTANAI. 7 mamyr. Qostanaı oblysynda Jeńis merekesin bıyl qarsy alatyn soǵys ardagerleri úsh júzden sál ǵana asady. Mereke qarsańynda oblys ákimi Nuraly Sádýaqasov oblystaǵy birqatar soǵys jáne tyl ardagerlerine memlekettik nagradalar tapsyrdy. Bul týraly egemen.kz tilshisi habarlady.
Oblys ákimi Nuraly Sádýaqasov soǵys ardagerleri Moldaǵalı Júnisbekovtyń, Nıkolaı Lıýlıýktiń, tyl ardageri Maǵaýııa Júnisovtiń keýdesine «Qurmet» ordenin taqty. Soǵys ardagerleri Aleksandra Efanova, Iаkov Qarataev, Muǵadar Serkebaev «eren eńbegi úshin» medalimen, soǵys ardagerleri Saıyn Imanbaev, Alekseı Komlık, Semen Iаkovlev Qazaqstan Respýblıkasynyń Qurmet gramotasymen marapattaldy. Birqatar soǵys jáne tyl ardagerleri «1941-1945 jyldarǵy Uly Otan soǵysyndaǵy Jeńiske 70 jyl» merekelik medaline ıe boldy.
Oblys ákimi Nuraly Sádýaqasov: «Uly Otan soǵysynda ot pen oqqa keýdesin tosqan atalarymyz erliginiń arqasynda búgingi urpaqtary osyndaı beıbit kúnge jetip otyr. Tyldaǵy eńbek te aýyr boldy, analarymyz jankeshti eńbegimen er azamattardy joqtatpaı, sharýashylyqtardy júrgizdi, maıdanǵa kómek berdi, balalardy asyrady. Búgingi urpaq mundaı erlikti máńgi umytpaýy tıis. Jeńistiń 75 jyldyǵyn da qarsy alyńyzdar», dedi.
Názıra Járimbetova.
Derek, sýret: egemen.kz
