Elimiz tarıhta alǵash ret júzýden álemdik deńgeıdegi aýqymdy jarys meımandaryn qabyldamaq. Silk Road-2026 halyqaralyq týrnıriniń alǵashqy kezeńi Ázerbaıjan astanasy Bakýde, al ekinshi kezeńi kórshiles О́zbekstannyń bas qalasy Tashkentte ótpek. Osylaısha halyqaralyq shara Uly Jibek jolynyń boıyndaǵy úsh eldiń astanasyn biriktiredi.
-Týrnır 25 metrlik basseınde ótedi, - deıdi uıymdastyrýshylar. Álem kýbogi elordada Olımpıada oıyndarynyń, álem chempıonattarynyń jeńimpazdary men júldegerleri, sondaı-aq álemdik rekord ornatqan áıgili sportshylardyń basyn biriktirmek. Al jarys kezeńderiniń naqty ótetin kúni týraly aqparat aldaǵy ýaqytta belgili bolmaq.
Mundaı halyqaralyq iri sharanyń elimizde ótýi – sý sportyna jańa serpin berip qana qoımaı, Qazaqstannyń sport salasyndaǵy bedelin halyqaralyq deńgeıde arttyrýǵa múmkindik beredi. Oǵan Qazaqstannyń Sý sporty federasııasynyń jańa basshylyǵynyń belsendi jáne júıeli jumysy úlken yqpal etti. Nurlan Jaqypov basshylyq etetin Federasııa halyqaralyq seriktestikti nyǵaıtyp, ınfraqurylymdy damytý jáne elimizdiń álemdik sport arenasyndaǵy ornyn nyǵaıtý baǵytynda nátıjeli jumystar júrgizip keledi.
Bul oraıda elimizde sý sportyn damytýǵa «Samuryq-Qazyna» qory eleýli úlesin qosyp otyr. Ulttyq ál-aýqat qory elimizdiń Sý sporty federasııasynyń bas seriktesi. Sonymen qatar, «Sport Qory», Qazaqstan Respýblıkasynyń Týrızm jáne sport mınıstrligi jáne Ulttyq Olımpıada komıteti de Federasııanyń bastamalaryna jan-jaqty qoldaý kórsetip keledi.
Osylaısha, «Samuryq-Qazyna» qorynyń qoldaýymen Astana júzýden álemdik deńgeıdegi jarysty ótkizetin qala retinde tanylyp otyr. Bul – tek sporttyq qana emes, mádenı jáne ımıdjdik turǵyda da úlken jetistik.
Astanada ótetin Silk Road-2026 fınaly – Qazaqstannyń álemdik sport qaýymdastyǵyndaǵy ornyn aıqyndaıtyn mańyzdy kezeń bolmaq.
Jansaıa Qapasqyzy
