Foto: Ashyq derekkóz
Qala ákimdiginiń habarlaýynsha, Dúnıejúzilik taekvondo federasııasynyń (World Taekwondo) resmı kúntizbesine engen bul jarys úsh jas ereksheligin qamtıdy: jasóspirimder, jastar jáne eresekter sanaty. Qazirgi tańda 750-den astam sportshy óz qatysýyn rastaǵan.
Baıraqty básekege Aýǵanstan, Armenııa, Kanada, Fransııa, Úndistan, Iran, Qazaqstan, Kýveıt, Qyrǵyzstan, Oman, Lıýksembýrg, Marokko, Nepal, Pákistan, Palestına, Qytaı, Saýd Arabııasy, Túrkııa, Týnıs, Birikken Arab Ámirlikteri, AQSh jáne beıtarap mártebesi bar (AIN) sportshylar qatysady.
Aıta keteıik, uzaq úzilisten keıin Qazaqstan álemdik taekvondo qaýymdastyǵynyń nazaryn qaıta aýdaryp otyr. Buǵan deıin elimizde G-1 sanatyndaǵy halyqaralyq týrnırler 2015 jyly Almatyda jáne 2017 jyly Atyraýda ótkizilgen bolatyn.
Bıylǵy doda jańartylǵan halyqaralyq standarttar boıynsha, KPNP K-2 júıesi arqyly ótedi. Qazaqstanda tuńǵysh ret dál ári ádil esepke alýǵa múmkindik beretin KPNP kompanııasynyń jańa elektrondy qolǵaptary qoldanylady. Sonymen qatar, bul týrnır aıasynda Dúnıejúzilik taekvondo federasııasynyń kórsetilim toby alǵash ret elimizde óner kórsetedi.
Is-sharaǵa Dúnıejúzilik taekvondo federasııasynyń prezıdenti doktor Chýngvon Cho, Azııa taekvondo odaǵynyń basshysy jáne World Taekwondo keńesiniń ókilderi qatysady dep josparlanǵan.
Qazaqstan taekvondo federasııasynyń prezıdenti Qudiret Shamıev týrnırdiń el ishinde de, halyqaralyq deńgeıde de taekvondonyń damýyna yqpal etetinin atap ótti.
«Kazakhstan Open týrnırin Astanada ótkizý – halyqaralyq sporttyq yntymaqtastyqty nyǵaıtýǵa jáne elimizdegi taekvondony damytýǵa baǵyttalǵan mańyzdy qadam. Elorda tórinde álemniń úzdik sportshylary bas qosyp, jastarǵa shabyt beredi, al Qazaqstan óz áleýetin jahanǵa tanyta alady. Bul jarys elimizdegi taekvondo damýynyń serpindi jalǵasy bolaryna senemin. Bizge senim artqan seriktester men Dúnıeúzilik federasııaǵa alǵysymyz sheksiz», dedi Qudiret Shamıev.
