Júzý jarysyna elimizdiń ár aımaǵynan 500-den astam qatysýshy jıylǵan. Olardyń arasynda júlde alamyn dep emes, babyn baıqaımyn dep kelgender bir qaýym. Árıne, olar úshin ólkeniń tabıǵatyn tamashalap, buqaralyq sıpatta uıymdastyrylǵan is-sharaǵa qatysýdyń ózi jeńis. Kim bilsin, olar da jarystan soń júzýge shyndap kirisip, aldaǵy jarystarda júldege iligýi ábden múmkin ǵoı. Desek te osy kúni áýesqoılar arasyndaǵy jarystarǵa qatysyp, júlde alyp júrgen myqtylar da boldy. Jarys qorytyndysy boıynsha erler arasynda Vladıslav Sýharev úzdik atansa, áıelder arasynda Lıýdmıla Iаkovleva izine qara saldyrmady. Bir artyqshylyǵy, júzý barlyq sanattaǵy azamattar úshin tegin boldy. Osyny estigen Býrabaıdaǵy demalýshylar da sýǵa súńgidi. Is-shara kýrortty aımaqta týrızmdi damytýmen aınalysatyn «Býrabaı damý» seriktestiginiń qoldaýymen ótti.
«Biz buqaralyq sıpatta ótetin osyndaı is-sharalardy árkez qoldaımyz. Júzý jarysy besinshi jyl qatarynan uıymdastyrylyp keledi. Al, Býrabaıda osymen úshinshi márte ótti. Sebebi biz osyndaı is-sharalar salamatty ómir saltyn nasıhattaýǵa taptyrmaıtyn múmkindik ekenin bilemiz. Ári osy arqyly ishki týrızmniń úlesin arttyrýdyń múmkindigi týdy», deıdi «Býrabaı damý» seriktestiginiń bólim basshysy Shyńǵys Orazalın.
Osymen jyl saıyn jazda ótetin PIKEMAN júzý jarysynyń kezekti maýsymy aıaqtaldy. Júzý sportymen shuǵyldanatyn azamattar keler jylǵy jarysty asyǵa kútedi.
