Sýret: astana-akshamy.kz
Bıylǵy V maýsymnyń jabylýy qazaqtyń uly aqyny, fılosof, sazger jáne aǵartýshysy Abaı Qunanbaıulynyń 180 jyldyǵyna arnaldy. Is-shara barysynda teatr dırektory Ashat Maemırov: «Kez kelgen teatr úshin maýsymnyń ashylýy men jabylýy júrekti tolqytatyn sát. Ári sizdermen bir aıdaı úzilis jasap, qaıtadan kezdesemiz. Osydan bes jyl buryn ashylǵanda da Muhtar Áýezovtiń «Abaı-Toǵjan» mýzykalyq dramasymen shymyldyǵyn túrgen bolatynbyz. Bul – teatrymyzdyń tólqujaty ispettes qoıylym. Osy besinshi mereıli maýsymda bes qoıylymnyń premerasyn jasadyq. Sondaı-aq kórermenderge 266 márte spektakl usynyp, bul qoıylymdardy 61 181 adam tamashalady», dedi.
Osy maýsymda teatr qorjynyna «Qyzjylaǵan» dramasy, «Sylań qyz» komedııasy, «Ámire» monospektakli, «S.O.S» dramasy, «Mánshúk» mýzykalyq dramasy enip, 5 jańa premeramen tolyǵyp, teatrdyń repertýaryndaǵy qoıylymdar sany 28-ge jetken.
«Abaı-Toǵjan» mýzykalyq dramasy – teatrdaǵy jańa týyndy. Balalar men jasóspirimder dúnıetanymyna, talǵamyna, rýhanı bolmysynyń qalyptasýyna áser etetin qoıylym – Abaı ǵumyrynyń bozbala kezeńinen kórinis beredi. Qoıylym rejısseri teatrdyń dırektory ári kórkemdik jetekshisi Ashat Maemırov bolsa, ınssenırovka avtory – Mıras Ábil, mýzykalyq keńesshisi – Dımash Qudaıbergen.
Jas Abaıdyń júreginde oıanǵan alǵashqy mahabbaty, kókireginde týǵan tuńǵysh jyry áýezdi ánge aınalyp, ishki sezim tebirenisterin alasapyran kúıge salady. Toǵjanǵa degen ińkár sezim – ómirge degen qushtarlyqqa ulasyp, Abaıdyń adamzatqa degen asqaq mahabbatynyń temirqazyǵyna aınaldy. Qunanbaıdaı ákeniń ónegesi, Uljandaı ananyń tárbıesi, qorshaǵan ortanyń tylsym syry, ǵashyqtyqtyń ǵalamaty, dos pen baýyrdyń qadiri jas kórermenniń janyna rýhanı lázzat syılap, sanasyna kórkem kózqaras qalyptastyrýǵa yqpal etedi.
