Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Gúlbolat Amanǵalıevanyń aıtýynsha, qandastardyń basym bóligi – 127 adam О́zbekstan Respýblıkasynan kóship keldi. Reseı Federasııasynan – 22 adam, Túrikmenstan Respýblıkasynan – 12 adam, Qytaı Halyq Respýblıkasynan – 7 adam jáne Mońǵolııadan 1 adam atamekenine oralyp otyr. Olardyń 153-i – Atyraý qalasyna, jeteýi – Jylyoı aýdanyna, 8 adam Qurmanǵazy aýdanyna, bireýi Maqat aýdanyna turaqtady.
– Bıyl Atyraý oblysynda qandastardy qabyldaýdyń óńirlik kvotasy aıasynda 100 adamǵa kvota bólindi. Osy kezge deıin komıssııa sheshimimen 56 otbasy (90 adam) kvota aldy. Kvota alǵandardyń arasynda О́zbekstannan – 63 adam, Qytaıdan – 10, Reseıden – 10, Túrikmenstannan 7 qandas bar. Qandastardyń kóshi-qon shyǵynyn óteý úshin 81 adamǵa 70 aılyq eseptik kórsetkishke sáıkes 22 mln 294 myń 440 teńgeniń birjolǵy áleýmettik tólemi berildi. Al 6 otbasy quramyndaǵy 13 adamǵa turǵyn úı jaldaýǵa jáne kommýnaldyq tólem úshin 20-25 aılyq eseptik kórsetkish mólsherinde 727 myń 420 teńge kóleminde aı saıynǵy járdemaqy taǵaıyndaldy, – deıdi G.Amanǵalıeva.
Onyń deregine qaraǵanda, zańda kórsetilgen merzimge sáıkes 15 qandastyń mártebesi 6 aıǵa uzartylyp otyr. Onyń ishinde 13 qandas buryn О́zbekstandy, bireýi Mońǵolııany, taǵy 1 adam Túrikmenstandy meken etken.
– Qazir Atyraý oblysynda qandastardy ýaqytsha ornalastyrý ortalyǵy turaqty jumys isteıdi. Maqsatymyz – elge oralǵan qandastardyń jańa ortaǵa beıimdelýine jasalǵan naqty qoldaý kórsetý. Mansap ortalyqtaryna júgingen 10 qandastyń beseýi áleýmettik qoldaýǵa ıe boldy. Ekeýi turaqty jumysqa, eki adam qoǵamdyq jumysqa ornalastyrylyp, bir adam qaıta daıarlaý kýrsyna jiberildi, – dep málimdedi G.Amanǵalıeva.
Atyraý oblysy
