Sýretti túsirgen – Erlan OMAR, «EQ»
7–10 tamyz aralyǵynda ótetin kórmede Qazaq tazysy alǵash ret FCI moıyndaǵan, halyqaralyq deńgeıde tanylǵan ıt tuqymy retinde resmı tanystyrylady. Jol shalǵaı, uıymdastyrýshylar shamamen 8 myń shaqyrym joldy eńserip, 5 kúnde jetemiz dep otyr. Tazylar jarystyń alǵashqy kezeńinen ótip jatsa, fınaldyq básekege shyǵady. Kórmede tazylardyń ózin-ózi ustaýyna, júris-turysyna da mán beredi. Jyl saıyn kórmege 100-den astam el 25 000-nan astam ıt alyp keletinin eskersek, báseke barynsha joǵary bolatyny sózsiz.
Kórmege alyp baratyn tazylardyń daıyndyǵy týraly Qazaqstan kınologter odaǵynyń prezıdenti Baýyrjan Serikqalıdan suradyq.
– Tazylardyń ishinde osaly joq, bári standartqa saı. Olar kınologter odaǵynyń ishki irikteý komıssııasynyń sheshimimen anyqtaldy. Jalpy, osyndaı iri kórmelerge aparatyn tazylarǵa talap qatań. Eýropalyq odaqtyń veterınarlyq talaptarynan ótýdiń ózi qıyn. Keleshekte osynyń barlyǵyn elep-eskerip, iri jarystardyń aldynda irikteý týrnırlerin uıymdastyrý josparda bar. Osy joly kórmege aparatyn tazylardyń barlyǵy túrli jarystarda chempıon bolǵan nemese júlde alǵan. Atap aıtqanda, Astana, Almaty, О́skemen, Semeıdiń «Azat», «Tamerlan», «Sakýra», «Pana», «Lashyn», «Arý», «Kókserek», «Altyn» atty tazylar, – dedi B.Serikqalı.
Kórme aıasynda «Qazaqstan kınologteri odaǵy» qoǵamdyq birlestigi qazaqy tazy tuqymyn resmı túrde halyqaralyq qaýymdastyqqa tanystyrady. Bul oqıǵany tazy tuqymynyń álemdik tusaýkeseri desek te bolady. Qonaqtar tazynyń shyǵý tarıhy, ekstererlik ereksheligi men ańshylyq qabileti týraly jan-jaqty aqparat alady.
Qazaqy tazy men tóbetti qorǵap, jahanǵa tanytý máselesi Memleket basshysy Qasym-Jomart Toqaevtyń tapsyrmasymen iske asyp keledi. Byltyr Halyqaralyq kınologııa odaǵy (FCI) qazaq tazysyn bólek tuqym retinde «shartty túrde» tirkedi. Qazaqy tazynynyń tolyq moıyndalýyna keminde 10 jyl ýaqyt qajet. Osy aralyqta bul baǵyttaǵy jumysty júıeli, tabandy túrde jalǵastyra berý kerek.
