Ońtústik Qazaqstanda Álııa Moldaǵulovaǵa eskertkish ornatyldy

ShYMKENT. 7 mamyr. Ońtústúk Qazaqstan oblysy Maqtaaral aýdany Ketebaı aýylyndaǵy Álııa Moldaǵulova atyndaǵy mekteptiń aldynda batyr qyzǵa bıik tuǵyrǵa ornatylǵan bıýst pen memorıaldyq taqta ornatyldy. Bul týraly egemen.kz tilshisi habarlady. Uly Otan soǵysynda erliktiń óshpes úlgisin kórsetip, qazaqtyń dańqyn shyǵarǵan surmergen qyz bir ulttyń ǵana batyry degen ólshemge sımaıdy. Osy aıtýly merekege arnaıy kelgen Respýblıkalyq ardagerler keńesiniń tóraǵasy, tarıh ǵylymdarynyń doktory О́mirzaq Ozǵanbaev Álııanyń erligi qazaq ul-qyzdaryna úlgi, ónege bolatyndyǵyn, el basyna kún týǵanda asyl erlerdiń jańqııarlyq erlikke baratyndyǵyn, Otan úshin otqa túskenniń kúımeıtindigin aıtty. Osy merekege Aqtóbeden arnaıy kelgen Álııanyń sińlisi Tájen Nurmuhamedqyzy «Osy mektepten bilim alǵan oqýshylar Álııa sııaqty Otanyn shynaıy súıetin úlken júrekti azamattar bolady dep oılaımyn» degen. Eskertkishti osy mektepten túlep ushqan azamattar óz qarjysyna ornatypty. Memorıaldyq taqtaǵa osy aýyldan soǵysqa attanǵan 45 soldattyń aty-jóni qashap jazylǵan. Jıynda sóz alǵan Maqtaaral aýdanynyń ákimi Serik Turbekov aýdannan maıdanǵa attanǵan 15 myńnan astam azamattardyń on myńnan astamy oralmaǵanyn aıtty. Mine, soǵys qandaı qasiret ákelgen. Aýdanda soǵys ardagerlerine laıyqty kómek kórsetilip jatyr. Birine páter berilse, biriniń úıi jóndeýden ótip, keteýi ketkeni qaıta salynyp jatyr. Soǵys ardagerin alyp júrý úshin kólik te berilýde. «Erlik eshqashan umytylmaq emes. Qarshadaı qazaq qyzy el basyna kún týǵanda buta túbin saǵalap qalmaı er azamattarmen birdeı soǵysty. Jalyndap turǵan jastyq shaǵyn Otanynyń basyna túsken náýbetti joıýǵa arnady. Álııa – qazaqtyń Tumar – Tomırıs syndy batyry. Onyń erlik baıany elimizdiń jastarynyń patrıottyq tárbıesine máńgilik qyzmet ete beredi», dedi osy ónegeli isti uıymdastyrýshylardyń biri, oblystyq máslıhattyń depýtaty Sádý Bekenov. Baqtııar Taıjan. Derek, sýret: egemen.kz