Jyl saıyn osy kórmege 100 eldiń ókilderi jalpy sany 25 000-nan astam ıt alyp keledi. Báseke joǵary. Kórmege baratyn eń úzdik degen tazylardyń ishinde Semeıden kelgen Sultan Asylbekulynyń Saryǵyz(qujattaǵy ataýy «pana») atty tazysy bar.
– Saryǵyz kúshik kezinen kórmede chempıon boldy. Sodan beri úsh márte eń úzdik tazy atandy. Jalpy, kórmelerde tazynyń dene turqy, aıaqtarynyń durys bitýi, qulaǵy, basynyń kólemi bári-bári standartqa saı bolýy kerek. Saryǵyz tek kórmelerge qatyspaıdy, aýylda ańǵa ertemiz. Ásirese, kúzde ańshylyq qyzady. Syrt kózge momyn, áljýaz, úrkek bolyp kórinetin tazylaryńyzdy sol kún tanymaı qalasyz. Tazylarymyzdyń qoıan, borsyq, túlki alǵanyna qarap tánti bolamyz. Eki tazy qatar shyqsa, jemtigin qos qaptaldan yqsyryp baryp ýysqa túsiredi. Jalǵyz shyqsa da solaı, jemtigin ańdyp, shap berip ustaıdy. Ań aýlaýdyń ádis-tásilin jaqsy meńgergen. Saryǵyz kórmege alyp shyǵatyn adammen birer saǵat daıyndasa, kóptiń ortasynda qaımyqpaı, erkin júredi. Kórmede de osy qarqynnan tanbaıdy dep oılaımyn,–deıdi S. Asylbekuly.
Kórmege baratyn tazylar Qazaqstan kınologtar odaǵynyń ishki irikteý komıssııasynyń sheshimimen anyqtalǵan. Ishinde osaly joq, bári standarqa saı. Olardyń qatarynda «panadan» bólek, Astana, Almaty, О́skemennen jetkizilgen «tamerlan», «sakýra», «lashyn», «arý», «kókserek», «altyn» atty tazylar bar. Osylardyń qaı-qaısysy da birneshe jarysta top jarǵan, úzdik ekenin dáleldegen tazylar.
