Búginde shahar aýmaǵynda eki negizgi rekreasııalyq aımaq jumys isteıdi: Almaty jáne soltústik jaǵalaýy. Almaty jaǵalaýynda iri qonaq úı keshenderi men jeke jaǵajaılar ornalassa, soltústik bóligi zamanaýı ınfraqurylymy bar qoljetimdi qoǵamdyq aımaq retinde damyp keledi.
Negizgi júkteme abattandyrylǵan №5, №6 jáne №7 jaǵajaılarǵa tústi. Munda sanıtarlyq jáne servıstik talaptarǵa saı jaǵdaı jasalǵan. Atar bolsaq, 75 ájethana, 170-ten astam qoqys jáshigi men konteıner ornatylyp, qutqarýshylar, medısına jáne tehnıkalyq qyzmetkerler kezekshilik etedi.
№5 jaǵajaıda kún saıyn 20 qyzmetker jumys isteıdi, demalys kúnderi munda 2,5 tonnaǵa deıin qoqys shyǵarylady. Al №6 jáne №7 jaǵajaılarynda 10 qutqarýshy men medısına qyzmetkerin qosa eseptegende 30 qyzmetker bar, demalýshylar kóp kúnderi shyǵarylatyn qoqys kólemi 3 tonnaǵa jetedi.
Qaýipsizdikti baqylaý úshin jasandy ıntellekt negizindegi beınabaqylaý júıeleri ornatylǵan. Jaǵajaıdaǵy jalpy jaǵdaıly polısııa, tótenshe jaǵdaılar qyzmeti jáne jeke kúzet mekemeleri qadaǵalaıdy.
Ákimdik dereginshe, jazataıym oqıǵalardyń kópshiligi ruqsat etilmegen oryndarda oryn alady. Sondyqtan turǵyndar men qonaqtarǵa tek resmı bekitilgen jaǵajaılarda demalýǵa keńes beriledi.
Qalada 140-qa jýyq týrıstik nysan jumys istep tur. Maýsym aıaqtalǵannan keıin №6 jáne №7 jaǵajaılaryn qaıta jańǵyrtý jáne jeke ınvestısııa esebinen №8 jaǵajaıdy abattandyrý jumystary bastalady. Jalpy jaǵalaý uzyndyǵy 6,1 shaqyrymdy qurap, biryńǵaı sáýlettik josparǵa saı jasalady dep josparlanýda.
Sondaı-aq 2028 jylǵa deıin Qonaevta jalpy quny 300 mıllıard teńgeden asatyn 11 iri týrıstik jobany iske asyrý kózdelgen. Olardyń qatarynda qonaq úı keshenderi, oıyn-saýyq ortalyqtary, golf-klýbtar men otbasylyq demalys oryndary bar.
Qonaev qalasynyń ákimdigi zamanaýı, qaýipsiz jáne qoljetimdi týrıstik ortany damytý – shahardy órkendetýdiń negizgi baǵyttarynyń biri ekenin atap ótti.Almaty oblysy.
